34 Pekara Manifesto GPS dikeamat dalam lima taun

KUCHING: Kepala Menteri Datuk Patinggi Tan Sri Abang Johari Tun Openg meri jamin deka ngamatka Manifesto 34-Pekara Gabungan Parti Sarawak (GPS) dalam timpuh lima taun deka datai.

Kenu ku Chairman GPS nya, iya andal raban sida ulih ngamatka semaya dalam manifesto nya nengah sukung rayat Sarawak.

“Aku meri jamin perintah ke diring aku deka bebendar dalam timpuh lima taun deka datai ngemujurka pekara ke udah disemaya ngagai rayat,” ku iya nyerumba Pesan Krismas 2021 enggau Taun Baru 2022, kemari.

Kenu ku iya, iya berasai gaga meda mandat ke chukup tegap diberi ngagai GPS ba Pengawa Bepilih Besai Nengeri Ke-12 (PRN-12).

“Mandat ke diberi rayat chukup nyengenda, laban ke nyadi tuai Perintah GPS, aku deka meri besai terima kasih enggau basa laban udah arapka kami bejalaika pengawa ngatur menua tu baka ke udah dirintaika ba Pelin Strategik Pemansang Sarawak 2030 Pasca-Covid-19 2030 ungkup timpuh lima taun ke deka datai.

“Tu mandangka juluk rayat Sarawak deka begempung enggau nyapai juluk nempa Sarawak mansang enggau bepenatai pemisi tinggi manggai taun 2030. Munyiku jaku sempama “Bersatu kita teguh, bercerai kita roboh,” ku iya.

Iya berebak enggau nya ngaku, laban nyadi Tuai Perintah GPS tanggungpengawa ke dipangku chukup berat endur ngamatka semaya baka ke udah dirintai dalam Manifesto 34-Pekara nya.

“Manifesto nya mungkur mayuh pekara nyengkaum autonomi enggau hak Sarawak, pemansang infrastruktur, pemansang ekonomi, pengelantang enggau pengelikun rayat enggau sosio-budaya,” kku iya.

Manifesto GPS entara nya nyamin penegap enggau autonomi politik Sarawak, ngetan enggau nyaga hak Sarawak nitihka Kunstitusyen Perintah Besai, Sempekat Malaysia 1963 (MA63), Kunstitusyen enggau Undang-Undang Sarawak sereta nyamin pengelantang ke mungkur semua rayat.

Suara Sarawak