Billy deka fokus ngaduka bidang pelajar di Opar

KUCHING: Bidang pelajar nembiak nyadi fokus besai semaya chalun Gempung Parti Sarawak (GPS) N01 Opar, Billy Sujang ba Pengawa Bepilih Besai Nengeri (PRN12) Sarawak ba renggat tu.

Iya madahka tu kena ngurangka penyeranta awakka rayat ulih idup enggau penatai pemisi ti mayuh agi jemah dudi ila nengah chara pemujur dalam pengawa sekula.

“Enti diberi awak sepengudah tu ila, aku deka ngaduka manah agi bidang pengawa pelajar nembiak kena nyadi siti pemansang modal mensia,” ku iya.

Iya mega madahka iya ngasaika ari peneleba diri iya empu bakani pengawa besekula ulih mantu ngangkatka pengidup sida ti diau ba menua pesisir.

Kelimpah ari nya, iya mega madahka deka ngemansangka industri penatai temuai di sitak Opar ngena chara makro enggau mikro sereta ngaga siti pasar alai mensia mayuh ti diau ba sitak nya ulih bebeli enggau bejual barang ti nyadi penatai pemisi.

Nangkan ke nya mega, mayuh macham perengkaguna ti meruan agi deka digaga ba sitak Opar.

Billy, peranak asal ari menua Lundu udah dipadu nyadi siku ari chalun keterubah ari GPS kena ngemansangka sitak Opar lalu gawa nyadi kepala pegawai Pengerai Rampa Menua ba Opis Pengerai Sarawak ari taun 1994 nyentuk diatu.

Ungkup penemu, Billy kala besekula ba Sekula Sekondari (SMK) Lundu enggau Kolej DPAH Abdillah, Kuching alu nampung ke pelajar iya ba tikas degree ba bidang Sains Pengerai.

Suara Sarawak