Pakan mesti mansang agi ari ke udah

PAKAN: Juluk ati nyema menang dipilih rayat deka ngangkatka agi pemansang ba Pelilih Menua Pakan ari ke udah, ku chalun Parti Bumi Kenyalang (PBK) Dun Pakan Jemeli Kerah.

Nya alai, iya ngarapka rayat di Dun N.47 Pakan ulih nguna kuasa enggau hak ba jari sida iya dikena milih pengari ti betul enggau keran gawaka rayat.

“Arapka rayat landik milih pengari ke ungkup lima taun ti deka datai ba Pengawa Bepilih Besai Nengeri (PRN) Sarawak Ke-12 tu,” ku Jemeli.

Udah nya, ku Jemelu tuju sida ba PBK bediri laban deka ngambi pulai hak Sarawak sereta deka ngintu rayat enggau lebih menyana.

“PBK deka ngemansangka Sarawak manah agi ari diatu enggau deka ngaga ubah ngelindung hak rayat enggau menua Sarawak.

“Enti PBK mujur ba PRN tu semua utai ke bedau deka digaga lalu iya deka nampung pengawa ke manah,’ ku iya.

Nangkan ke nya, nyema menang dipilih nyadi pengari rayat ba Dun Pakan, Jemeli madah diri deka ngemanahka infrastruktur pemun.

Iya deka minta Dun Pakan digagaka Balai Polis, Balai Bomba, Opis Pos, Bank, telekomunikasyen ti meruan enggau stesyen minyak.

Pia mega deka ngemanahka Klinik Pengerai Pakan besai agi ari diatu ungkup pengelantang rayat.

Ba ngemansangka pengawa batanam betupi, peranak asal Pakan nya madah deka ngubah chara lama ngagai chara baru ungkup bala pekebun di Pakan ambika penatai pemisi rayat betambah.

Suara Sarawak