Pengawa nagih hak MA63 deka dipajak

KUCHING: Perintah Sarawak meri jamin deka majakka pengawa nagih hak Perintah Nengeri ba Perintah Besai bekaul hak nengeri ke udah dikelaung baka udah dipekat dalam Sempekat Malaysia 1963 (MA63).

Kepala Menteri Datuk Patinggi Tan Sri Abang Johari Tun Openg madah,nya nyengkaum bejalaika pekara ke bedau dititih dalam MA63 nyengkaum pengari Sarawak dalam Kaunsil Direktor Kaunsil Asil Dalam Menua (LHDN).

“Alhamdullilah, kitai udah ngerikod siti pemujur lebuh ubah Kunstitusyen pasal MA63 deka meri hak sebaka ngagai Tanah Melayu, Sarawak enggau Sabah nyadi tiga bakih ti udah numbuhka Malaysia sereta ngaku MA63.

“Pia mega, sekeda pemujur ke udah dijapai sebedau tu iya nya mulaika hak baka chukai asil nyual produk petroleum enggau ngaku kuasa Sarawak nitihka Ordinan Ngali Minyak 1958 (OMO 1958),” ku iya.
Iya madah munyi nya nengah Pesan Krismas 2021 enggau Taun Baru 2022, kemari.

Ku iya, nadai utai ke lebih beguna ari pemalu enggau nama Sarawak.
“Aram kitai semak agi enggau pangan diri besaup ngangkatka Sarawak ngagai tikas ke lebih tinggi ba sukut pemansang menua.

“Nengah pengasai enggau semangat Sarawak Sebilik ke udah lantang, begulai manah enggau mungkur semua, aku nesai semua komuniti pupu bansa enggau pengarao terus bebasaka pangan diri nuju tikas nasional,” ku iya.

Berebak enggau nya, iya minta semua rayat ke ngintu Krismas terus ngasika SOP ke udah ditetap taja tikas kena rampit Covid-19 udah nurun ngagaoi dua angka.

“Selamat Hari Krismas ngagai semua rayat Sarawak, aku ngarapka semua kita nyambung Krismas enggau ati lantang sereta bulih berekat.

“Enggau peluang tu aku mega meri Selamat Taun Baru 2022 ngagai semua rayat Sarawak enda ngira dini endur kita.

“Aku ngarapka taun 2022 meri mayuh agi pemujur ngagai Sarawak enggau rayat dikena ngemansangka menua ke disayau,” ku iya

Suara Sarawak