Pengundi di Samariang diperansang sampal nurun ngundi 18 Disember

KUCHING: Chalun Gempung Parti Sarawak (GPS) Samariang, Datuk Sharifah Hasidah Sayeed Aman Ghazali meransang raban pengundi kelebih agi ba sitak iya bela sampal nurun ngundi maya Pengawa Bepilih Nengeri Ke-12 (PRN-12) kena 18 Disember tu.

Ku iya, pengundi anang irau laban pengawa ngundi deka dipejalai enggau Atur Pengawa Standard (SOP) ti terit.

“Aku minta mensia mayuh enggau pengundi ba Samariang bejalaika tanggung pengawa kita nurun ngundi kena 18 Disember tu ngambi milih perintah ti deka megai Sarawak.

“Pengawa ngundi tu deka dipejalai enggau likun laban nitihka SOP ti terit, reti iya SOP deka dipejalai enggau silik agi. Nya kebuah, anang nangi nurun ngundi laban likun,” terang iya.

Hasidah mansutka jaku nya ba randau eksklusif begulai enggau Suara Sarawak ba Palan Servis Adun N7 Samariang, ditu kemari.
Berebak enggau nya, iya nangkan pengundi milih parti ti ngembuan rikod manah sereta ditemu bejalaika tanggung pengawa.

“Aku mega minta pengundi milih parti ke bisi rikod manah baka GPS lalu nyukung nama ke dipeda ba sitak kita kelebih agi ba Samariang enggau selampur menua.

“Nya mih pengandal aku ngagai bala pengundi lalu ngarapka sida ulih sampai ngundi ila,” ku Hasidah nyemetak madah.

Iya madah baru, pengundi ti berejister ba sitak Dun Samariang naka diatu penyampau 21,459 ke alai setengah ari nya indu lalu setengah agi lelaki.

“Nya kebuah, kami bisi lapan pelilih ngundi, 10 palan pengundi ba Samariang enggau bisi 50 saluran ngundi,” terang iya.

Ungkup rikod, ba PRN-12 Dun Samariang bepadan tiga penjuru iya nya Hasidah (chalun GPS); Abang Halil Abang Naili (chalun Parti Amanah Negara) enggau Datuk Othman Abdillah (chalun Sedar).

Suara Sarawak