Perintah setuju meri opis baru ungkup SPANS

KUCHING: Perintah Sarawak setuju meri opis baru ngagai Komiti Besai Pengereja Pengawa Perintah Nengeri Sarawak (SPANS) ba Tingkat 16 enggau 17 di Begunan Hikmah Exchange Jalai Haji Taha, Satok ditu.

Kepala Menteri Datuk Patinggi Tan Sri Abang Johari Tun Openg madahka opis nya dipelabaka tembu ba renggat ketiga taun baru.

“Beserimbai enggau ngintu Jubli Intan SPANS sehari tu (kemari) aku enggau temegah madahka Perintah Sarawak setuju meri opis baru ngagai SPANS di tingkat 16 enggau 17 Begunan Hikmah Exchange,” ku iya.

Abang Johari bejaku munyi nya rambau Program Ngelancharka Jubli Intan SPANS ti dipancharka terus nengah Facebook Unit Komunikasyen Perintah Sarawak (Ukas) kemari.

Ku iya, dua taun ti udah nyadi timpuh ti mar sereta penanggul ngagai menua tang pengereja pengawa perintah nengeri ulih nempuh penanggul nya enggau manah sereta efisyen.

“Tu nunjukka pengereja pengawa perintah nengeri meruan besedia enggau ulih ngeletakka diri dalam sebarang ubah pengawa baikka ari sukut politik, ekonomi, rama enggau teknologi,” ku iya.

Nangkan nya, iya madahka pengereja pengawa perintah mega patut ngembuan integriti ti tinggi lebuh ngaga pengawa enggau manah sereta ngempu tanggungpengawa ti udah diberi.

“Pengawa nya dikena nentuka menua diatur manah awakka raban pengereja pengawa perintah ulih dipebasaka rayat.
“Perintah Sarawak endang komited ngintu integriti nyadi ulah ba semua renggat pupu raban bansa,” ku iya.

Sama bisi datai Menteri Muda ba Opis Kepala Menteri (Integriti enggau Ombudsman) Datuk Talib Zulphilip, Sekretari Perintah Nengeri Datuk Amar Jaul Samion, Chairman SPANS Datuk Abdul Ghafur Shariff enggau ke bukai.

Suara Sarawak