Sarawak nengeri chunto ba pemansang Ekonomi Digital

KUCHING: Sarawak ulih nyadi chunto ngagai nengeri bukai ba Malaysia laban udah mandangka kualiti pelasar pemadu manah nyendiaka pemansang Ekonomi Digital betikas entarabansa.

Menteri Komunikasyen enggau Multimedia Tan Sri Annuar Musa madah, inisiatif digaga Perintah Nengeri tu berupai ke mua nengah pengawa numbuhka Kampung TEGAS digital enggau mega hab digital ke lalu nyikap ekosistem di nengeri tu.

“Tu endang siti pelin ke patit diperati nengeri bukai laban aku ngasaika chara tu ulih digaga ba semua nengeri.

“Aku nadai kakang madah Perintah Sarawak udah dulu ke mua laban Kepala Menteri Datuk Patinggi Tan Sri Abang Johari Tun Openg nyengala bisi perambu ‘way forward’ (jalai mansang).

“Terang amat perambu tu ukai digaga ungkup dagang laban perintah Sarawak nemu pemesai guna sukut digital ekonomi.

Iya madah munyi nya maya dirandau pemberita pengudah ngabas kampung Digital TEGAS di Samajaya Tabuan, ensana.

Berebak enggau nya iya ngaku penemu iya kitu endang deka ngelala enggau belajarka pengawa digaga Perintah Sarawak dikena nentuka pemujur pemansang.

Ku iya, Perintah Sarawak udah sesingkang ke mua dalam ngelakuka pemansang ekonomi digital nengah perengkaguna nyentuk ngagai program legasyen.

“Perintah Sarawak udah bejalaika inisiatif ke manah iya nya nyendiaka perengkaguna ke chukup ungkup ekonomi digital ditu,” ku iya.

Nya alai, iya nyemetak madah pekara nya nyadi siti pekara besai ungkup Perintah Besai enda kakang nentuka internet Sarawak entara ke pemadu manah.

Ku iya, Sarawak udah dipilih nyadi sebuah nengeri pemadu tumu nerima internet 5G.

Suara Sarawak