Tanggungpengawa Opis Pelilih Simunjan diatu lebih lempung

GEDONG: Pemutus Perintah Sarawak ngangkatka Gedong nyadi pelilih menua deka ngelempungka tanggungpengawa Opis Pelilih Menua Simunjan sereta ngujungka sida ulih meri servis ti lebih manah ngagai mensia mayuh.

Sekretari Perintah Nengeri Datuk Amar Jaul Samion madahka sebedau tu sitak Gedong diatur ba baruh Pelilih Menua Simunjan.

“Nengah pengeluas 2,218 kilometer persegi sereta penyampau peranak ti dipelabaka 49,000 iku ba palan besemak, Gedong, Simunjan enggau Pelilih Sebuyau deka bulih pemaik.

“Kelimpah ari nya, bisi 265 buah menua enggau rumah panjai ti direjister mega ba baruh kuasa Pelilih Menua Simunjan,” ku iya.

Jaul bejaku munyi nya rambau Bejadika Gedong Nyadi Pelilih Menua ti dipenyadika Kepala Menteri Datuk Patinggi Tan Sri Abang Johari Tun Openg ditu, kemari.

Nya alai, ku iya lebuh Gedong diangkat nyadi pelilih menua tating pengawa ba Opis Pelilih Menua Simunjan deka kurang lalu ngujungka servis nyadi lebih jampat nitihka peminta peranak ba genturung nya.

Iya nandu, atur pengawa baka ngatur reta tauka probet, atur ngiru anak, kort Bumiputera, Atur Pekara Tuai Raban Bansa enggau atur peminta pengelantang pendiau deka ulih diatur ba Opis Pelilih Menua Gedong ila.

“Penumbuh Pelilih Menua Gedong endang engkeman nyukung mayuh program enggau projek ba Bagi Menua Samarahan nengah Ejensi Pemansang Bersepadu Wilayah Samarahan (IRSDA) ti dipelabaka deka nyungkak pengerembai sosioekonomi peranak di Gedong,” ku iya.

Suara Sarawak