Tumbuhka Opis Menteri Orang Gawa ba Kabinet Baru

KUCHING: Perambu ke dibantaika iya nya pematut numbuhka sebuah Opis Menteri Orang Gawa ba nengeri tu endang senutuk, ku pemikir politik, Profesor Datuk Mohd Fadzil Abdul Rahman.

Kenu ku iya, pekara tu patut digaga nyema perintah deka ngaga Sarawak nyadi nengeri mansang manggai taun 2030.

“Nengah pemisi opis menteri nya, perintah ulih meri perati ngagai pemansang pemisi mensia enggau orang gawa dikena nentuka skop ke diselinting.

“Nyema diperati ngagai perambu enggau agenda ke deka digaga, ulih disimpulka penumbuh nya endang perambu ke manah laban ngembuan kaul enggau juluk perintah nengeri ti deka negapka raban pengereja pengawa,” ku iya madah ngagai Suara Sarawak, ensana.

Taja pia, iya madah sebarang pemutus bepanggai ngagai guna perintah nengeri nyema ngasaika pemisi Opis Orang Gawa aja udah chukup.

Kenu ku iya, pematut bisi opis menteri nya endang patut digaga nyema deka meda pengawa ke diatur jampat agi dikemujur laban bisi orang matau pengawa enggau mutarka isu ke bekaul enggau pemansang orang gawa enggau ke bukai.

Ngelansa silik perintah mega patut berundingka chara bukai numbuhka Opis Menteri Orang Gawa kediri baka opis menteri bukai ke bisi kaul enggau pemansang orang gawa.

Nangkan ke nya, pekara ke sama bela disukung siku agi pemikir politik Profesor Dr Awang Azman Awang Pawi.

“Perambu deka numbuhka Opis Menteri Orang Gawa endang pekara ke manah enggau dikelalu lebih agi ba pengawa ngatur orang gawa.

“Taja pia ejensi tauka opis menteri ke ngatur pekara ke bekaul udah bisi ba kabinet ke udah semina pengawa nya dipasuk ba opis menteri bukai,” ku iya.

Ku iya, perambu nya patut diperundingka perintah tauka diberi nama baru awakka lebih manding seriris enggau jeman teknologi sereta setipak enggau pemansang globalisasi dudi hari.

Suara Sarawak