Anang nyalam enti nemu anak bisi buya dadah

 

KUCHING: Apai indai tauka ruang bilik dipinta ngambika enda malu tauka kakang ati ngeripotka anak nyema nemu anak sida bisi buya dadah.

Menteri Muda Ba Opis Kepala Menteri (Undang-undang, MA63 enggau Kaul Sarawak-Perintah Besai) ti mega Adun Samariang Datuk Sharifah Hasidah Sayeed Aman Ghazali madahka apai indai enda tau nyalam nyema nemu anak sida bisi ngaul diri enggau dadah.

“Ungkup pengidup anak nya, anang malu tauka kakang ati ngeripot anak kita awakka anak nya ulih diperubat.

“Anak nya ukai ngaga kes salah (jenayah), sida semina tepejuh enggau ulah gian dadah lalu sida enda ulih lepas enti enda diubat nitihka chara ti betul,” ku iya.

Sharifah Hasidah bejaku munyi nya lebuh ditanya pemberita pengudah Bejadika Program Solidariti Nembiak 2022 Ngelayo Bersama Belia di Kampung Sungai Bedil enggau Kampung Lintang di Balai Mensia Mayuh Kampung Lintang ti diatur Ejensi Benchi Dadah Nasional (AADK) ditu, kemari.

Dulu ari nya dalam jaku iya, Sharifah Hasidah madahka dadah nyadi munsuh lumur satu ngagai nembiak jeman diatu.

“Nya alai, program AADK amat beguna dibai ngagai genturung pendiau ngambika sida ulih dijauhka ari pengawa salah nguna dadah.

“Nyema anak kitai udah tepejuh nguna dadah, kitai apai indai udah tentu irau sereta enda lantang ati nya kebuah perintah bebendar ngatur mayuh program enggau inisiatif awakka bala nembiak benchika dadah.

“Taja pia, kerejasama entara apai indai, ejensi enggau perintah beguna dikena ngemujurka semua perambu ti digaga kitai,” ku iya.

Suara Sarawak