CHAIRMAN PASIMA…ISA LEE

KUCHING: Audisyen Pekit Bintang Klasik Iban Ke-3 deka diatur baru berengkah bulan Julai tauka Ogos taun tu endur ngiga penau anak seni ke bisi ngembuan sada nyawa baka penanyi veteran.

Nitihka penerang Chairman pekit, Pengajar Isa Lee madahka pekit tu udah lama enda diatur ketegal bemacham penanggul ke enda ulih diseliah.

“Pekit Bintang Klasik Iban tu kala diatur kami taun 2012 enggau 2016. Tang udah nya, perambu deka ngatur pekit nyau tejanggal diumba menua nyau tebunsa ketegal Atur Mindah Betagang (PKP).

“Kitai bela besampika pekit tu mujur diatur sereta nerima sukung ari raban bekaul awakka industri muzik Dayak enda pungkang nempa enggau ngangkatka raban orang ke bisi penau ba pengawa belagu,” ku iya maya dirandau pemberita ba Opis Suara Sarawak, kemari.

Isa ke mega Chairman Gerempung Anak Seni Iban Malaysia (Pasima) madah Pekit Bintang Klasik Iban tu kala ngasilka artis rikoding Iban tebilang baka Eisner Nala Jackson enggau Tony Rumpang.

Berebak enggau nya, Isa madah pekit serak tu deka tebuka ngagai semua bansa asal aja nemu nyadaka lagu Dayak Iban berengkah umur 18 taun ke atas sereta ulih dipasuk pemekit ari luar Sarawak nyengkaum ari Semenanjung, Sabah enggau Kalimantan, Indonesia.

Ungkup penemu reti Pekit Bintang Klasik Iban tu iya nya raban pemekit deka nyadaka lagu-lagu Iban lama ke kala dikeluarka ari taun 1960 nyentuk 1990, ku tandu Isa.

Ngelansa pekara bukai, Isa ke mega penanyi Iban ke tebilang enggau lagu Tubai Pengerindu madah diri deka merindang mensia mayuh ba Kedai Kamek Metrocity berengkah bulan Februari tu ila.

Suara Sarawak