NERANG… Azizul Anuar Adenan benung nerangka perambu pemansang ti deka digaga iya ungkup Dun Tanjung Datu.

KUCHING: Perambu pemansang ba semua pekara nyengkaum infrastruktur, modal mensia enggau jalai pengarap entara tuju besai Azizul Annuar Adenan ngemansangka Tanjung Datu ungkup timpuh lima taun ke deka datai.
Ku Adun Tanjong Datu nya, semua perambu ba sitak nya mesti ditentuka lanchar dipejalai.

Ku iya, kitai mesti nyukung penuh semua inisiatif dipejalai ejensi bekaul ba pemansang ke meri empas di Tanjong Datu.

“Nya kebuah, semua orang mesti meri buah penemu nempa siti resolusyen deka nentuka pemansang berurun agi lalu projek enda besibil ungkup lima taun ke deka datai,” terang iya.

Nambahka nya ku Azizul, kitai bela nemu Kepala Menteri Datuk Patinggi Tan Sri Abang Johari Tun Openg nya siku ketuai ti jauh perening dekaka Sarawak nyadi menua maju manggai taun 2030.

“Aku setujuka penemu iya (Abang Johari) pasal atur perintah patut dikemanah ari atur ke mayuh kelikuh enggau projek nya dipejalai enggau lanchar.

“Reti iya, kitai merambu deka puntan enti kitai puntan merambu sesebengkah projek.

“Bengkel Lundu Development Way Forward N3 Tanjong Datu diatur dikena merambu enggau bekerejasama ngemansangka Lundu manggai taun 2030 seriris enggau juluk Abang Johari,” ku iya nerang.

Azizul mansutka jaku nya lebuh bejadika Bengkel Lundu Development Way Forward N3 Tanjong Datu.
Ngelansa pasal bengkel tu, iya madahka batang tuju bengkela nya dikena merambu pemansang ari semua pekara bekaul infrastruktur, modal mensia enggau jalai pengarap ungkup lima taun ke deka datai.

“Nya alai, kitai deka nitihka perambu tu baka Langgur Pemansang Malaysia Lumpar Ke-12 (RMK-12) pengelama lima taun lalu deka beratika pekara nya empu.

“Kami deka meda baka ni pemansang ke udah dipejalai enggau diperambu ba sitak tu tiap dua taun setengah, sekalika lanchar dipejalai, baka ni status iya enggau ke bukai,” ku Azizul.

Suara Sarawak