KUCHING: Diskaun 50 peratus suwa pasar enggau palan bedaja ari Kaunsil Kandang Menua (PBT) bagi orang bedaja enggau pedagang mit diteruska baru berengkah Januari nyentuk June 2022 dibaruh BKSS 8.0.

Kepala Menteri Datuk Patinggi Tan Sri Abang Johari Tun Openg madahka bantu tu deka meri pemaik ngagai lebih 10,165 iku pedaja ti berejister sereta nyuwa ba pasar engga palan bedaja PBT.

“Bantu tu ngaul ungkus belanja RM1.7 juta ti deka ditanggung Perintah Sarawak,” ku iya.

Abang Johari bejaku munyi nya rambau Aum Media Khas BKSS 8.0 di Wisma Bapa Malaysia, ditu kemari.

Nangkan nya, Abang Johari mega madahka penyuwa Skim Kaunsil Pemansang Pengawa Berumah (HDC) deka terus nerima bantu diskaun suwa 50 peratus berengkah Januari nyentuk June ti deka datai.

“Bantu tu deka meri pemaik ngagai lebih 3,200 penyuwa Skim HDC di serata Sarawak ke alai perintah melanja ungkus diskaun penyampau RM2.6 juta,” ku iya.

Berebak enggau nya, iya madahka Perintah Sarawak mega neruska kelaung bayar suwa orang Dagang Mit enggau Jelan Pemesai (PKS) ti ngena premis ti diempu serikat kaul perintah enggau serikat GLC nengeri.

Iya nandu, bantu tu mega diberi ungkup timpuh enam bulan berengkah Januari nyentuk June tu ila.

Iya madahka, kelaung bayar suwa tu ngaul ungkus belanja RM2 juta ari Perintah Sarawak.

Suara Sarawak