Gambar pengias : Pendiau sungai ke meruan lubuk.

LEBUH bala orang rumah panjai deka ngaga skim kebun getah kawin ba taun 1961 kelia, mayuh amat mensia ba menua kami di Saratok charut pasal tanah.

Kebuah pia, laban tebal agi, enti enda semua, tanah ke deka alai numbuh kebun nya nadai bepala.

Nya alai maya nya, mayuh bala sida ke tuai-tuai kelam kabut, ke lalu ngujungka bala sekeda bisi ngambu tanah orang bukai, lalu padah ka tanah sida.

Berindik ari tu, mayuh amat laya tanah udah nyadi rambau nya, enda nyalah-nyalah baka ba ujung taun 1980an ngagai pun taun 1990 suba lebuh SALCRA baru deka berengkah ditumbuhka ba genturung menua batang Kedap enggau sungai Burui di Saratok.

Nyadi kes charut bempu tanah maya SALCRA nya suba udah diatur enggau jalai chara ba court.

NGAUH NARANG

Tang dalam taun 1961 suba, mensia agi jauh siga runding, nya alai ukai semua kes charut bempu tanah dibai bechara ngagai court tauka atur tuai rumah tauka penghulu.

Ba genturung menua kami, berebut tanah nya ukai semina entara diri serumah tang bisi mega enggau orang ari rumah bukai, lalu tebal agi ukai kaban belayan semak baka diri petunggal.

Nya alai bisi aya aku siku (ke enda ngasuh nyebut nama) charut enggau siku tuai orang dalam batang Assam (nama iya sengaja enda disebut ditu). Seduai bela madahka tanah nya, ba tebing sungai Burui, pati Melupa, enggi diri empu.

Siku orang bukai pan enda berani jadi saksi laban tuai ari batang Assam nya mayuh penemu ngemedis orang nyengkaum pengaruh bisa.

Nyau ujung iya, sida milih deka ngatur penyarut nya kalam ai. Reti kalam ai nya bebetah nyelam dalam ai bepegai ba tungkat tauka turus kayu ke dijuak lalu enda mudah techabut, dikemataka bala mayuh, lalu chukup enggau piring enggau ading.

Dalam atur kalam (ke dalam) ai, dua iku pengari ari dua piak (siku-siku sepiak) ke bisi penyarut nya, lalu asuh bebetah nyelam bepegai ba turus nya. Sapa ti betah agi nya menang. Sapa dulu pansut ari dalam ai nya mih alah.

Nyadi alah, nya reti iya alah ba penyarut nya. Enti charutka tanah, reti nya iya ti alah nya enda ulih ngempu tanah nya.

Nyadi ba dalam taun 1961 suba, lebuh kalam ai tegal penyarut tanah sida di Burui, aya aku ari menua kami milih niang apai tuai aku menya, iya nya Ngauh anak Narang ke bensumbar Lelayang Mandi Pukul Lapan – iya bisi bedengah dua iku lebuh ke mawa belelang di menua Miri enggau Baram kelia – ngarika tuai aya nya nyelam lebuh sida enggai bechara tang nguji minta sah Petara ngena jalai lama, iya nya kalam ai.

Bala sida ari Assam nyin pan bisi manuk sabung sida empu, ke enda disebut nama ditu,laban enggaika kena bantah bala anak, bala uchu-ichit iya.

Enti baka manuk seduai ke diambi nyelam nya endang sama bulu enggau tisik bisa, endang sama suah udah disabung ba menalan besai.

Gambar Pengias : Sungai dalam.

Lebuh ngatur pengawa sida bisi madah bala tuai-tuai ba ai kami awak ka sama enggau ngemata lalu jadi saksi pengawa kalam ai sari nya.

Enti enda salah ingat aku niang Pengulu Guyang ari Kerangan asai ke bisi datai meda pengawa nya. Aku agi mit tang udah ingat. Sida milih alai kalam ai nya ba siti pala lansar, kaki lubuk ke pemanah iya penalam.

Udah turus diunjam lalu bisi enchukak mimit alai bepegai, seduai ke jadi manuk sabung asuh kalam ai, nya lalu asuh sedia.

Dulu ari nya, seduai udah ngatur piring seduai kediri empu. Tuai akim lebuh nya, niang Jerampang anak Saat ke bensumbar Pintu Batu Nanga Igan, Indu Balu Tengah Malam pan udah ga sedia.

Udah bekau orang nyampi minta adu, minta intu petara aki petara ini, lebih agi Seragindi Petara Ai, sereta piring udah diengkah ba kelingkang lalu gantung ba atas ai, seduai lalu asuh nyelam bepegai ba turus.

Lama ga seduai bebetah, nyentukka siku ari Assam nyin nyau melepung bepegai ba turus tang nyau kelama enda tan agi lalu pansut. Nyadi Apai Tuai Ngauh bedau merabubuk ai, agi nadai engkebut.

Menang meh tuai aya ari rumah kami. Enda lebu ga ngasuh niang apai tuai menya, ke bisi ngembuan batu tekuyung, lalu enda mudah nginsit rarat tauka melepung.

Nyadi ba menua bukai rambau nya, tauka dulu agi, endang suah bala Iban udah nguji ngatur penyarut sida ngena jalai kalam ai. Nyadi ba menua kami, udah nya nyentuk ka saritu, nadai agi nemu bisi orang kalam ai.

Iban kelia nemu kalam ai ari laya gerama seduai ukui. Laya tu belabuh ari ukui ke seruran memunyi kaing-kaing tegal bedarah telu pelir udah bekau kena gigit gerama lebuh iya ke gali ba atas kerangan.

Nyadi ku cherita tu, gerama ke ngigit nya kejang iya baru deka mulai diri ngagai lubuk.

Rambau nya kelia, menua agi balat siga, lalu bala Iban pan agi semak enggau antu, enggau jelu.

Lalu lebuh ukui ke didinga kaing-kaing nya, sida baru deka mulai ka diri udah bekau ninga Simpulang Gana ke ngatur siti laya, iya nya entara Ribut enggau Simpang Impang, nitih ku niang aya Benedict Sandin menya dalam bup iya Raja Durong.

Nya alai meda gerama balat beduan ukui, orang mayuh lalu ngasuh ngiga gerama kedalam lubuk awakka iya kena ukum. Tang sida nadai chara ngiga gerama kedalam lubuk, laban lubuk nya nyau gadung letu empa pemesai enggau penalam.

Meda bakanya Raja Seragindi lalu bejaku ngasuh ringin ngiga gerama laban ringin tu betah nyelam. Ringin pan lalu nyelam, lalu berangkapka rau, begigaka gerama.

Nyau kelama baru iya pansut manggum gerama lalu dibai iya ngagai semak ukui ke agi kaing-kaing.

Sereta ukui meda gerama, iya lalu nekus merejuk-rejuk, ama ngetup, ama dilengka ka iya ga. Udah nya ringin lalu bejaku. Ku iya, ”Laban aku udah nulung penusah nuan ukui, keagi tu ila badu agi nuan nyalak bansa kami nyentukka uchu ambu peturun tua ila datai ka jemah ila.”

Ninga munyi nya, tudah ukui pan lalu nitih pinta ringin sereta lalu besumpah madah diri badu agi nyalak ringin. Iya lalu mesan ngagai uchu ambu iya nyentuk ka dudi hari enda ngasuh sida nyalak ringin.

Bala ke diau be menua ulu nyangka udah bidik tepeda ka ukui ke sigi enda nyalak ringin. Anang ka iya deka nyalak, enti iya tetemuka tai ringin ke makai gerama, ukui ukai semina ensium iya, tang lalu ngali ka diri malai tai nya nyentukka saritu.

Tudah pangan, amat meh suah mansa tai ringin ke ngenjing apus dunya laban penyai bau iya, bedau kala meda ukui ngali diri ba tai ringin. Tang ku bala sekeda ke selalu mai ukui bejalai endang, amat munyi ku jerita nya tadi.

Nyadi ukui udah nya lalu ngasuh ringin bepemakaika gerama belama lama iya. Nya alai nyentuk ka saritu, ringin endang bepemakai ka gerama bumur umur, laban iya udah ngemediska ukui.

Nyadi nya meh pun kitai bansa Iban teulihka penemu ke dalam ai kena nigi pengelurus lebuh bisi penyarut.

Ku sema bala mayuh lebuh meda ringin ke mina mesai lengan tang mujur tegiga sereta nangkap gerama ba lubuk besai enggau dalam, besai ari nya pen endur belalai, enti belalai tegal penyalah ulih meh giga, ku sida.

Suara Sarawak