DATUK SERI DR STEPHEN RUNDI

KUCHING: Bekal dagin jani ba menua tu dijamin chukup dikena nangkup peminta Taun Baru China (TBC) ke deka datai.

Menteri Betanam Betupi Moden enggau Pemansang Wilayah, Datuk Seri Dr Stephen Rundi Utom madah, semua bekal nya ari pemansut besai dagin jani iya nya di Kuching, Samarahan enggau Serian.

“Urung 80 peratus ari bekal dagin jani ba menua tu datai ari endur ke nadai ngerikod Tabin Jani Afrika (ASF),” ku iya nerang, kemari.

Nambahka nya, Rundi madah Opis Servis Veterinar Sarawak (JPVS) udah neritka pejalai nganjung jani idup ngagai bagi menua bukai lalu bisi atur tambah.

Rundi mega madah, tu nyengkaum sekeda Atur Pengawa Standard (SOP) ti ditetapka baka permit semina diberi ngagai ladang jani bisi lisin enggau kod ladang sida.

“Permit nya mesti disempulang enggau Setipikit Pengerai Veterinar,” ku Rundi nerang.

Pia mega ku iya, perengka pengangkut ti dikena mega mesti dicuci pengudah nganjung jani nya.

Ku iya, jani mega deka dikelai ngena kod ladang tauka tag pending enggau jani semina ulih disayat ba rumah ngintu jani raban bekuasa tauka rumah ngintu jani bisi lisin ari JPVS.

“JPVS deka neritka atur biosekuriti ke manah agi dikena nagang pengerekai ASF di palan pemansut bekal jani wilayah selatan,” terang iya baru.

Nya alai, iya ngelalau sida ke nupi jani neritka atur biosekuriti ladang enggau ngaga ripot nyema jani bisi kelai ngagai Opis Veterinar besemak.

“Aku meri jamin dagin jani ba pasar udah disayat ba rumah ngintu jani lalu selamat diempa,” terang Rundi.

Suara Sarawak