TAN SRI NOH OMAR

KUCHING: Bemacham program enggau kus dilanggur bekaul pemansang pedagang deka dipejalai ba selampur Sarawak.

Menteri Pemansang Orang Dagang enggau Gerempung Kerejasama Malaysia, Tan Sri Noh Omar madah, tebal agi pedagang ba menua tu meri timbal ke chukup manah ba program ke kala diatur sebedau tu.

Ku iya, entara chara ti diberi perati nya baka nyendiaka mesin ATM mindah kin kitu ba sekeda sitak semak mengeri.

“Chara keterubah nya nyendiaka mesin ATM mindah kin kitu. Terima kasih ngagai Perinta Sarawak laban udah nyendiaka bank mindah kin kitu ngagai rayat.

“Nya kebuah, bemacham chara deka sama dipejalai ngagai rayat dikena mantu pedagang di Sarawak,” terang iya.

Noh mansutka jaku nya lebuh dirandau pemberita pengudah ngatur pejalai nemuai meri basa ngagai Kepala Menteri Datuk Patinggi Abang Johari Tun Openg, kemari.

Pia mega ku iya, sida benung berandau deka muka pampang Bank rakyat di Kalimantan enggau Lundu dikena nambahka aktiviti pedagang di sitak nya.

Nambahka nya ku Noh, tu beduduk ari kerejasama entara Kaunsil Pemansang Ekonomi Sarawak (SEDC) enggau Bank Rakyat deka dikena meri peluang belanja ngagai pedagang ti deka ngepunka dagang.

Iya mega madahka kerejasama nya beguna amat dikena ngepunka pengawa mantu ngemansangka pedagang di menua tu.

“Diatu pedis deka ngiga belanja dikena ngepunka dagang lebih agi pengudah pandemik Covid-19 tu.

“Nya alai, kami ngarapka bantu ari Bank Rakyat tub ala pedagang nadai dichaj laban deka diberi Perintah Sarawak subsidi dikena mantu pedagang di baruh pegai SEDC,” ku iya nerang baru.

Suara Sarawak