JARANG DIULIH…Bakih Cassidy iya nya Tanel Freddie mega kala bulih ikan tuman ke sebaka ba palan ke sama di Limbang.

LIMBANG: Ikan tuman batik belikau biru sepemerat 7 kilogram (Kg) ke ulih ginti siku lelaki ba Kampung Bangkuati, ditu balat narit ati mensia mayuh sepengudah gamal ikan nya dipandang ba laman media rama, Facebook.

Ikan tuman batik belikau biru tu sigi bisi ba menua kitai di Sarawak ditu tang jarang bendar ditemu mensia mayuh.

ULIH DITU…Pendiau parit ladang sawit ke alan Cassidy bulih ikan tuman nya

“Udah lama aku ngemeranka pengawa nginti kena ngisi maya lepa, tang tu mih keterubah iya aku bulih siku ikan tuman batik ti chukup pemesai sereta nyelai. Likau ikan tu bechura biru balat nyelai ari ikan tuman bukai.

NYELAI…Ikan tuman belikau biru ke ulih Cassidy nginti.

“Maya aku nginti pagi kemari (ensana), asai ke enda pechaya aku teulihka ikan ti chukup pemanah sereta nyelai baka tu. Asaika bulih tekang intan,” ku Cassidy Baru Dawat nyeritaka pengaga diri.

Nangkan ke nya ku iya, umba ati ti balat gagit meda pemanah likau ikan nya, dia iya lalu bekunsika gambar ikan nya ba Facebook.

Ari nya mensia mayuh bela muji sereta alit ati meda pemanah likau ikan nya.

Cassidy mega madahka bakih ti sama gawa enggau iya ti benama Tanel Freddie bela kala bulih ikan nya dulu agi ari iya maya nginti ba palan ti sama kilah lemai ensana.

Siku agi penguna Facebook, ke benama Azhar madahka anak menyadi iya mega kala bulih ikan tuman batik belikau biru baka nya maya nginti ba Sungai Kudey, Kuching kena bulan Desember 2021.

Kelimpah ari nya, bisi mega penguna media rama ke bukai ba laman Facebook Miri Edition bela bekunsika diri kala bulih ginti ikan tuman batik ngembuan chura ke sebaka.

ASAIKA BULIH INTAN…Cassidy mandangkan ikan tuman ke ulih iya lemai ensana.

Suara Sarawak