Diskaun bil utiliti disambung nyentuk bulan June 2022

KUCHING: Perintah Sarawak agi neruska diskaun ungkup bil utiliti mungkur bayar karan enggau ai ngagai rayat Sarawak berengkah bulan Januari nyentuk June taun tu di baruh BKSS 8.0.

Kepala Menteri Datuk Patinggi Tan Sri Abang Johari Tun Openg madahka inisiatif meri diskaun lima nyentuk 25 peratus bil kuasa karan ninting bulan nya diberi ngagai penguna domestik, komersial enggau industri enam bulan keterubah taun tu.

“Diskaun tu deka meri pemaik ngagai 647,000 ruang bilik, penguna komersial enggau industri di serata Sarawak.

“Nya ngujungka Perintah Sarawak deka melanja ungkus diskaun bil kuasa karan penyampau RM166.8 juta,” ku iya.

Abang Johari bejaku munyi nya rambau Aum Media Khas BKSS 8.0 di Wisma Bapa Malaysia, ditu kemari.

Kelimpah ari nya, iya madahka diskaun bil ai 10 ngagai 25 peratus mega deka diterima penguna domestik, komersial enggau industri ninting bulan berengkah Januari nyentuk June tu ila.

“Diskaun tu deka meri pemaik ngagai 647,000 ruang bilik mega.

“Perintah Sarawak melanja RM24 juta belanja dikena meri diskaun bil ai nya,” ku iya.

Suara Sarawak