KEREMBAIKA PENGAWA BETANAM BETUPI… Abdullah Saidol begambar ungkup kenang enggau bala bukai ba Program Agricop di Pulau Bruit, kemari.

MUKAH: Nadai penerang silik pasal empas bantu betanam betupi ti nambahka penatai pemisi penerima bantu perintah, ku Adun Semop, Datuk Abdullah Saidol.

“Bantu betanam betupi diagihka perintah mesti dipansik manah sekalika nyungkak ekonomi rama enggau penatai pemisi sida ke udah nerima bemacham bansa bantu.

“Kami enggaika bantu tu semina manah ba keretas tang penatai pemisi sida ke nerima bantu tu nadai berubah,” ku iya nyemetak madah.

Abdullah Saidol mansutka jaku nya ba Program Betanam Betupi Ngaul Komuniti (AgriCOP) diatur Opis Betanam Betupi Mukah di Balai Komuniti Tekajong di Pulau Bruit, Daro, kemari.

Sama datai Pegawai Opis Betanam Betupi Bagi Menua Mukah, Malissa Bonaventure, Menijar Besai Gerempung Orang Bumai MatuDaro Wahad Kawi, Pegawai Pengereja Pengawa Sarawak Opis Pelilih Daro Yusuf Hussin enggau semua tuai komuniti.

Iya mega minta ejensi bekaul matau semua penerima bantu betanam betupi ngambi ngena manah semua bantu nya.

Abdullah Saidol mega ngarapka perintah ulih nampung Program AgriCOP tauka program bantu bukai ngena agih belanja besai ngambi juluk perintah numbuhka mayuh palan tibang pemakai nyadi nyata.

Abdullah ke mega Menteri Muda ba Opis Kepala Menteri (Pekara Korporat enggau Unit Komunikasyen Perintah Sarawak) madah, diatu pengawa bekebun majak dikerindu raban nembiak enggau chara ke moden enggau produktif agi.

“Nya kebuah, penemu pasal bemacham pengawa betanam betupi mesti ditambah lalu bemacham kereban betanam betupi mesti diberi ngagai sida ke endang bekebun,” ku iya.

Ku iya, mayuh sitak tebing tasik ke ami bisi pengulih nyadi palan tibang pemakai sereta bisi pengulih nyadi palan pematak temuai.

Nambahka nya, iya meransang nembiak ba sitak Dun Semop numbuhka serakup ngambi bemacham program tauka bantu ulih disedia.

Abdullah mega madah, iya semampai nyukung enggau mantu ngulihka agih belanja nyengkaum ngemansangka raban indu ba pengawa ngaga produk baka keropok, kerepek enggau ke bukai.

“Pekara tu deka nentuka raban indu ulih nyaup laki sida nambahka penatai pemisi ruang bilik maya musin landas tauka lebuh pengawa bekebun enda ulih dipejalai laban diatu kitai napi gaya hari enda menuku,” terang iya silik.

Ku Abdullah, jalai raa ba Pulau Bruit ngagai sitak bukai deka meruan agi kelebih agi pengudah dua jematan penyambung tembu digaga ba timpuh dua taun agi.

“Aku ngandalka Pulau Bruit kelebih agi Palan Pemansang Genturung Pendiau (RGC) disediaka palan dagang besai ungkup aktiviti renchit enggau ngangkat di zon tengah ungkup asil berikan enggau betanam betupi ari Pulau Bruit nyengkaum sitak besemak,” terang iya.

Suara Sarawak