Gaga strategi belajar komprehensif

BETONG: Semua sekula dipinta ngatur strategi belajar ti komprehensif (lengkap) nyengkaum muka ruang koloborasyen enggau sekeda raban ti ulih nyungkak pengulih chalun STPM enggau SPM ba sekula sida.

Menteri Muda Nembiak, Lumba enggau Pemansang Dagang Datuk Gerald Rentap Jabu madahka, nengah pengawa muka renggat tiga ti berengkah sehari tu, nembiak ti ba kelas peresa majak dampih napi STPM enggau SPM ti ditagaka ba bulan March taun baru.

Ku iya, raban sekula mesti merambu strategi belajar ti komprehensif enggau meri pangka manah dalam nyendiaka chalun SPM enggau STPM ba tikas pemadu manah.

“Tu nyengkaum nempa kaul kerejasama enggau semua raban ti ulih mantu ngemanahka penau enggau penemu nembiak ngambika sida ulih nyapai pemutus ti manah dalam peresa ti deka datai.

“Ambika chunto ba sitak aku, Komiti Pemansang Pelajar Layar (LEDC) enggau SMK Saint Augustine deka bejalaika Program Sinar Mutiara SEMESTA nyadi inisiatif ngenegapka baru semua chalun ti deka napi peresa iya nya nyikap fizikal, runding enggau emosyen,” ku iya.

Iya bejaku munyi nya lebuh ditanya pasal pengawa muka sekula bagi renggat tiga ti berengkah sehari tu, kemari.

Adun Layar nya mega mesan bala chalun peresa ngambika enda terunda.

“Kena manah awak ti bisi lalu beri perati ungkup belajarka subjek ti lubah ditemu.

“Kelimpah ari nya, terus tegapka subjek ti udah ditemu ngambika bulih pemutus peresa ti manah,” ku iya.

Lebuh dipinta nimbal pengirau apai indai nganjung anak ke sekula, Rentap nyemetak madahka penegap ati ngagai pengelikun enggau SOP nagang pengerekai Covid-19 mesti dikembuan.

“Anang takut nyema udah bulih vaksin enggau aku pechaya raban sekula udah ngatur sereta nyikap manah pekara tu seriris enggau Pelin Ngemanahka Menua (PPN) ti diatu ba renggat keempat.

“Apai Indai mesti mantu mulaika pechaya bala anak pasal pengawa ti disediaka raban sekula dalam sukut perambu ngatur risiko napi renggat tiga tu enggau manah.

“Jaga pemeresi, jaga takah fizikal enggau seruran ngena sengkabung mua.

“Aku bisi dipadahka tebal agi sekula nguna chara muka sekula betatak, iya nya meri ruang ngagai nembiak belajar betemu mua enggau pengajar, ngurangka defisit pengawa belajar sereta nyikap pengawa ti patut ungkup niki ngagai pom baru berengkah March 2022 ila,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak