Gawa bebendar agi ungkup rayat

KUCHING: Kaban Parti Sa’ati Rayat Sarawak (SUPP) diansak terus gawa bebendar agi ungkup rayat sereta anang enda dampih enggau raban biak.

Presiden SUPP, Datuk Seri Dr Sim Kui Hian madahka nya siti ari pemar ti deka ditapi sida rambau Pengawa Bepilih Besai (PRU-15) ti deka datai laban raban pengundi beumur 18 taun udah berengkah.

“Meda pemutus pengawa bepilih apin lama, aku chukup gaga tang kitai enda ulih enda ngira raban biak agi terus meri peluang ngagai Gempung Parti Sarawak (GPS),” ku iya.

Kui Hian bejaku munyi nya ba rambau bejadika Aum Besai Deligasyen Ninting Taun SUPP 2021 di indu opis parti nya ditu, kemari.

Ku iya, taja pan raban ke beumur 50 ngagai 60 taun enda tegar baka orang biak, sida mega mesti ngaul orang ti besai tuai (tengan umur).

“Tikas pengawa tu mesti digaga bebendar nentuka momentum.

“Ba PRU ti deka datai tentuka SUPP enggau komponen GPS ngempu mayuh penuduk awakka Kaban Parlimen Serian Datuk Seri Richard Riot enda sunyi ba Aum Parlimen,” ku iya.

Iya ti mega Sapit Kepala Menteri madahka mayuh agi Kaban Parlimen ari Sarawak, nyamai agi endur sida negika hak Sarawak.

“GPS mesti kering ngambika nadai agi orang ulih beduan Sarawak.

“Beri kami 10 taun agi, pekara ti enda ulih digaga 60 taun suba deka dikemujur,” ku iya.

Ku iya, bagi nyapai juluk nya, kaban parti patut begempung lalu badu ngulang penyilap ti udah.

“Pekara nya ngambi awak ti lama ungkup kami angkat ari taun 2006 datai ba tikas tu.

“Anang ngerubuhka enti kita sayau ke parti, sayauka Sarawak,” ku iya.

Berebak enggau nya, iya madahka parti nya mega patut besedia napi Pengawa Bepilih Besai Nengeri ba taun 2027 ila laban mayuh penuduk baru dipelabaka engka deka ditumbuhka.

“Enti dipeda ba pengawa bepilih besai nengeri ti diatur bulan Disember taun siti, rayat nyemetak nulak parti bepengkalan di Semenanjung Malaysia.

“Lalu siti ari kebuah SUPP mayuh menang iya nya pengundi China mayuh pulai tang bisi sekeda pengundi Bumiputera ngalih,” ku iya.

Iya nandu, nyema enda ketegal undi bepechah ba parti penyakal, SUPP engka enda ulih ngempu sekeda penuduk.

Ba PRN-12, SUPP ngempu 13 ari 18 penuduk ti dipekitka ke alai GPS ngempu 76 ari 82 penuduk.

Suara Sarawak