i-GPS agi ulih dipinta taun tu

KUCHING: Bala nembiak Sarawak diperansang minta inisiatif graduet pulai Sarawak (i-GPS) ti dilanjar ungkup taun 2022.

Nitihka penerang ari Sarawak Volunteers, atur enggau malin minta inisiatif nya udah dikemaru enggau berengkah dipejalai kena 1 Januari tu tadi.

“Siku peminta semina ulih nerima subsidi-GPS dua kali aja taun tu.

“Peminta enggau pengawa ngemaru penerang mesti digaga dalam online nengah sistem ti disediaka ba website yayasansarawak.org.my tauka ngena aplikasyen Yayasan Sarawak Student App,” ku penerang nya, ditu kemari.

Inisiatif ti dilancharka Kepala Menteri Datuk Patinggi Tan Sri Abang Johari Tun Openg ba taun 2019 nya dikena mantu nembiak Sarawak ti belajar ba Palan Pelajar Tinggi (IPT) Semenanjung Malaysia, Sabah enggau Labuan lebuh pulai ke menua tu.

Ku penerang nya, rega subsidi siku peminta nya RM300 aja lalu sida ke ulih nerima subsidi tu iya nya anak Sarawak beumur 18 taun enggau tuai ari nya lalu haribulan penerebai mesti dalam taun 2022.

“Sida mesti nganjung peminta ti betul ba timpuh 60 hari pengudah haribulan penerebai nya.

“Lalu enda ulih dikena ungkup penerebai dipelanja ari perintah tauka ejensi bekaul perintah tauka organisasyen bukai nyengkaum penerebai ti dikinsil serikat penerebai,” ku penerang nya baru.

Ungkup rikod, Penyanding Penemu Sarawak Volunteers ke mega Adun Tupong, Fazruddin Abdul Rahman madah, berengkah ari Februari 2019 ngagai 29 Oktober 2021, Perintah Sarawak udah ngagihka belanja RM10.7 juta ungkup inisiatif nya.

Ku iya, ba timpuh nya mega, sepenyampau 49,195 peminta udah diterima lalu 34,905 ari nya udah dikemendar iya nya 18,118 ba taun 2019, 13,167 ba taun 2020 enggau 3,620 naka Oktober 2021.

Suara Sarawak