Tempuan sekula SK Long Bemang ke alai siku nembiak ba sekula nya labuh ketegal udah repuk, apin lama ke udah.

KUCHING: Pengawa ngatur proses tinda dikena ngaga enggau nyeruri perengkaguna Sekula Primari (SK) Long Bemang, Baram deka diadu lengkas pengabis laun bulan Februari tu.

Menteri Kanan Pelajar Malaysia (KPM) Datuk Dr Radzi Jidin madahka pekara nya bekau ari ripot bekaul siku nembiak Primari 2 di SK Long Bemang ti labuh ari tempuan sekula ti udah repuk apin lama.

“Aku terus minta sida ngatur pansik ngagai sekula nya baikka nama sekula nya bisi dipasukka ba projek pemansang enggau nyeruri sekula repuk KPM, ke alai sida madahka sekula nya endang udah dalam rintai tu.

“Ungkup bantu jampat, Opis Pelajar Nengeri Sarawak udah nyendiaka agih belanja dikena ngadu pengawa nganti kayu tempuan enggau nyeruri mimit sekula nya ti benung dipejalaika diatu enggau bisi sekeda udah tembu,” ku iya dalam siti penerang media, ensana.

Radzi madahka, KPM deka nentuka pejalai projek nganti papan tempuan nya bejalai manah nyengkaum ngatur lengkas proses nyirika kunteriktor pengudah tinda dibuka ila awakka perengkaguna ti lebih kondusif ulih disediaka ba sekula nya.

“Aku besampi ngambika Aliccia (nembiak ti labuh) gerai jampat enggau ulih besekula baru.

“KPM seruran bebendar nyendiaka infrastruktur sekula ti manah enggau likun ungkup pekara pelajar ba jeman ti deka datai,” ku iya.

Kena 21 Januari tu tadi, siku nembiak di SK Long Benang labuh ari sebuah tempuan sekula ti udah repuk tang iya nadai napi balat bakal.

Berita pasal nembiak ti labuh nya, nyadi berita ti balat dikunsi mensia mayuh ba media rama.

Suara Sarawak