NADAI LIKUN…Jalai jematan kayu ke bisi udah runtuh ulih ngeruga penguna jalai ke suah ngelawa SK Nanga Menjuau, Lubok Antu.

LUBOK ANTU: Bala pengajar SK Nanga Menjuau enggau peranak menua Ulu Skrang minta raban bekaul lengkas berundingka atur ke patut ngemanahka jalai batang ke suah ditengah sida lebih agi diatu benung musin pengujan.

Penulung Kanan Administrasyen SK Nanga Menjuau, Pengajar Jesse anak Nicholas madah sida nadai pilih jalai bukai lalu semina nya aja batang jalai ke ditengah taja lichau tetap dipansal.

Sekula ke bepalan jauh ba menua ulu tu semina ulih dilawa ngena jalai batang Kapu pengelama empat jam pejalai (100km ari simpang Lubok Subong). Udah nya enti ari jalai Pakan tama ari simpang Engkamop nengah jalai batang WTK bisi tiga jam lebih pejalai.

Jalai lama batang Ulu Layar diatu nadai ulih ditengah agi laban kelalu balat jai.

Pia mega, jalai perintah ari Murad mega enda ulih ditengah laban pengawa nyeruri jalai tu ti digaga sida Opis Kereja Raya (JKR) enda datai ba Ulu Skrang.

PENGAJAR JESSE ANAK NICHOLAS

“Semua jalai batang tu tadi kelalu mar ditengah kelebih baka maya pengujan diatu. Nya alai, mayuh amat tanah tusur nyadi lalu jematan kala runtuh ti ngujungka jalai batang nya putus enda ulih ditengah. Penanggul tu ulih mai penusah ti besai lebuh maya bisi penusah rabat,” ku Jesse.

“Sekula (SK Nanga Menjuau) tu ulih dilawa nengah jalai ai ari penyangkai rumah panjai Emperan lalu mudik ke ulu. Sebedau ngenatai kediri ngagai penyangkai rumah panjai nya, tetap mega nengah jalai batang ti mar,” ku iya.

Udah nya, ku Jesse kira ke 5km ari SK Nanga Menjuau, jalai batang ba senentang Bukit Kemantan chukup penyai lalu ngujungka mayuh entukar besai empat ruda jai nengah jalai nya.

“Penusah siden ngena motosikal suah nyadi maya nengah jalai tu nyentukka entukar ti mai YB Dr Johnnical Rayong kala lap ba endur nya maya pengawa bepilih tu empai lama ke udah,” ku penerang ari Kepala Pengajar SK Nanga Menjuau, Alexander Patrick anak Uring.

“Genap kali bala kami ti bejalaika tanggungpengawa diri ba sekula nya enggau peranak menua nya maya ke betengahka jalai batang semampai irau ati ke pengelikun diri empu sereta nyau begenggam ke semengat belama,” ku iya.

Lebuh nyeritaka peneleba diri betengahka jalai batang sekumbang ke ngajar ba sekula nya ba pengelama sembilan taun ke udah, Jesse madahka sida sebuat kala bemalam ba rantau jalai sereta kala numpang tinduk ba langkau dampa kebun orang ketegal jalai batang nya putus lalu pia mega jalai bebukit kelalu lichin enda ulih tengah.

“Nya alai, beguna amat besindangka pemakai enggau ai irup maya mulaika diri tauka mansang ke sekula nengah jalai batang nya laban kitai sigi ngadang pekara ke enda disadang ulih nyadi sebarang maya,” ku iya.

BALAT LICHIN…Jalai batang ke balat lichin ditengah nyerumba musin pengujan

“Sekeda peranak menua nya ti bela betengahka jalai batang nya iya nya Rumah Upok Lepong Kepayang, Rumah Lidom Sungai Paya enggau Rumah Robert Nanga Menjuau,” ku Alexander.

“Arapka pengari rayat ti udah dipilih rayat menua tu nyengkaum raban JKR bela muka mata, putarka lengkas penusah rayat menua ulu lalu ngiga jalai dikena mutarka penusah tu enggau lengkas.

“Pia mega, ngarapka perintah meri sekeda ungkus belanja dikena nyemin jalai ti mar ba senentang Bukit Kemantan sereta lebih manah agi enti nukar jalai batang nya ngagai jalai batu tauka jalai jemin,” ku iya.

Berebak enggau nya, Jesse mega madahka Kaban Parlimen Lubok Antu, Jugah Muyang kala meli minyak diesel ngambika bisi dikena bala kontraktor nyeruri jalai batang dia tang nya enda tan lama laban maya ari ujan jalai nya pulai rusak baru.

Nya alai, Jesse ngelalau perintah anang betangguh ngatur pemansang ungkup menua ulu.

“Pemansang menua ulu patut dikemerat laban rayat menua ulu jauh tinggal pemansang lalu utai ti balat diguna sida iya nya jalai alun ti manah baka ba mengeri,” ku iya.

Suara Sarawak