Jani tupi mayuh parai di Durin deka dipansik

SIBU: Opis Veterinar Sarawak (JVS) Sarawak deka mansik bekaul enggau jani tupi mayuh parai di Durin.

Pekara tu dipadahka Direktor iya, Dr Adrian Susin Ambud lebuh dirandau, ditu kemari.

Ku iya, sida udah nerima ripot bekaul pekara nya.

“JVS deka ngelalau pekebun nambahka biosekuriti di kebun enggau nyeliah ari meri laluh pemakai ngagai jelu tupi sida nya.

“Enti kitai deka meri pemakai nya mesti dipanduk abis nadai 30 minit dikena munuh igi penyakit Tabin Jani Afrika (ASF),” ku iya.

Dr Adrian mega ngelalau anang mai jani ari luar ke dalam ladang.

“Tukar gari, kasut enggau meresi kereban sebedau masuk ngagai kandang jani. Beri pemakai enggau ai irup beresi.

“Anang ngasu jani kampung tauka ngabas ladang jani bukai dikena nyeliahka pengerekai igi penyakit ASF,” terang iya.

Beduduk ari nya, iya ngansak sida ke nupi jani ngaga ripot ngagai JVS besemak enti bisi mayuh kes jani parai ngenyit.

“Enti pekara tu nyadi ba ladang kita tauka jelu tupi, tau nganjung pesan nengah aplikasyen Whatsapp ngagai hotline 016-2840918.

“Anang muai bangkai jani kita laban nya siti penyalah,” terang Dr Adrian.

Kena Hari Tiga tu tadi, raban Kaunsil Pelilih Menua Pesisir Sibu (MDLBS) ti bekuasa ba Zon Durin, Kaunsilor Teo Boon Siew udah madahka mayuh jani parai ba sitak nya pengudah dipadah sida ke nupi jani nya.

Iya mega madah, pegawai ari Opis Veterinar Bagi Menua Sibu deka ngabas ladang nya minggu tu.

Suara Sarawak