Jasa Alexander Peridi chukup berega nyadi volunteer pengari opis pengerai

Taja ukai lutur tang nya enda nekul pengawa manah Alexander Peridi, 52 nabur jasa ngagai urung 300 iku peranak Kampung Tuba di ulu Pantu.

Lebuh datai ngusung rumah iya, pemberita tekenyit meda sebuah jemari kacha ti penuh ditusun ubat ti bebida sebaka sekali enggau gaya tusun ba rak farmasi.

Meda penatai aku, peranak asal Kampung Tuba nya semina tuchum seraya mesan enda ngasuh aku ngambar jemari nya laban ku iya tebal agi bansa ubat ti ditusun nya ubat ti dijaga perintah.

Udah nya, iya madah diri dichiri nyadi pengari raban pengerai ba kampung nya kenyau lima taun ke udah iya nya ari taun 2017 diatu servis Alexander nyadi siti chara dikena peranak kampung ngulihka bekal ubat nyengkaum dua buah menua besemak iya nya Kampung Pelaie enggau Kampung Pendawan di ulu Sebuyau.

“Aku suba semina suah ngusung Klinik Pengerai Mentu tang aku jampat ngelala bansa ubat, ari nya pemesai pengerai di klinik nya nganjung aku enggau dua iku agi kami belatih sepengelama tiga minggu.

Alexander Peridi, 52.

SIRUKA ORANG TUSAH

“Siku ari kami udah badu lalu siku agi aku enda nemu iya agi ngubat orang tauka enda, tang aku empu sigi neruska pengawa tu nyadi volunteer,” ku iya lebuh ditanya Suara Sarawak.

Apai ngagai tiga iku anak tu madahka, taja pan tanggungpengawa tu mar tang pengingin ati siru deka mantu mensia mayuh terus nyadi pekara ti dikemerat iya.

“Aku gaga nyema mujur ngubat orang kelebih agi ngidupka nyawa mensia laban nya ngasuh ati aku tepantup.

“Meda sida (peranak menua) nyau bejurut minta bekal ubat ngasuh ati aku berasai sinu laban pejalai ari menua kami ngagai klinik pengerai pemadu dampih ngambi awak dua ke tiga jam.

“Penanggul tu nyata agi dipeda lebuh servis lutur terebai enda ulih datai kitu maya musin ujan, semina aku meh endur sida bepanggai ngulihka bekal ubat.

“Nya alai, lebuh lutur terebai bisi datai kitu tauka lebuh aku ngusung Klinik Pengerai Mentu, aku sigi mayuh ngambi bekal ubat nyangkung sida di rumah panjai laban aku nemu sida mar undur ke klinik,” ku iya.

Iya madahka, ninting bulan urung 100 iku peranak menua deka ngatur semaya ngulihka bekal ubat ngagai iya.

PENGUJI PEMADU BESAI

Gelo Ajan.

Nyerita kenang pasal penguji pemadu besai lebuh ngubat pesakit, Alexander madahka iya kala ngubat siku peranak menua ti balat bakal ketegal tepantapka betis iya empu.

“Bakal nya besai enggau dalam, ngujungka urat betis iya putus.

“Bekau ari nya, darah iya enda badu-badu pansut sereta nichir.

“Endang aku takut, tang maya nya nyawa pesakit nyadi pekara dikemerat aku,” ku iya.

Taja pan iya besampi ngambika kes baka nya nyadi keterubah enggau kepenudi, tang pekara nya udah beri peransang ngagai iya terus nabur jasa ngagai peranak menua.

“Aku enggai ninga orang madah takut meda darah laban nya enda meri peransang ngagai aku.

“Jaku madahka diri takut nya ukai pemar ngagai aku, tang aku ngarapka bisi orang ulih mantu aku ngubat pesakit ngambika iya jampat gerai.

“Kitai semua bela nemu, nyema orang nya lenyau mayuh darah nyawa iya ulih bebadi, nya alai aku enggau naka ulih ngubat sida,” ku iya.

Iya mega berasai gaga laban servis tu nerima timbal manah peranak menua seraya madahka pengawa iya majak muntang pengudah bisi arus penyambung ti disediaka perintah dua taun ke udah.

“Peranak di Kampung Pelaie enggau Kampung Pendawan datai kitu merau urung sejam lebih pejalai.

“Udah menua kami bisi arus penyambung, sida semina nganjung gambar kad enggau bansa ubat ngagai aku, aku ulih nyendia lalu sida ulih ngambi ubat sebarang maya.

SERVIS LEBIH MUNTANG

TR Jantai Gendu.

“Servis aku nyadi lebih muntang, enda ibuh sida ngirum pesan ari orang ti mudik kitu laban sida ulih terus betelefon ngagai aku empu,” ku iya.

Ngaku servis tu enda deka padam dalam ati iya, Alexander ngarapka deka ngembuan nembiak ti ulih nyadi pelapis ba maya ti deka datai nyambung pengawa manah nya.

“Aku minta ngagai perintah nambahka siku tauka dua iku pengari pengerai baru nyadi pelapis ba maya ti deka datai.

“Pengawa tu begunaka niat enggau ati ti lurus, aku begunaka pelapis ti enda nemu leju ngereja pengawa baka aku empu lima taun ke udah lalu,” ku iya.

Pia mega, iya ngarapka perintah ulih meri insentif dikena nanggung ungkus perengka pengangkut lebuh iya nurun ngambi bekal ubat ngagai klinik pengerai.

BELANJA DITANGGUNG KEDIRI

“Aku ngeluarka ungkus perengka pengangkut kediri empu ngulihka bekal ubat ba klinik pengerai baka minyak kerita nya alai enti ulih aku ngarapka perintah meri insentif mimit meh.

“Taja pan pengawa aku matau tikas pengerai ti mit baka tabin enggau ke bukai, tang lebuh bisi kes ngenyit aku meh ti ngesah sida dulu baka kes balat bakal.

“Aku mega bisi diberi kuasa ngeluarka surat tangkan ngagai pesakit ngambika sida ulih beperesa berubat di sepital tauka klinik bagi kes berat,” ku iya.

Siku orang tuai di Kampung Tuba, Gelo Ajan, 70 madahka penanggul ngulihka bekal ubat darah tinggi enggau penyakit gaot ditapi iya muntang lebuh bisi servis Alexander.

“Klinik pengerai pemadu dampih iya nya Klinik Pengerai Pantu enggau Klinik Pengerai Mentu ti ngambi awak dua jam pejalai, chukup pedis ngirit diri mindah ngambi bekal ubat.

“Diatu aku semina datai ngusung rumah Alexander minta ubat seraya nganti lutur terebai datai meresa tikas pengerai aku,” ku iya.

Kelimpah ari nya, TR Jantai Gendu, 62 mega ngarapka Alexander bisi penulung dikena ngemuntangka pengawa iya.

“Maya lutur terebai nadai datai, jalai jai tauka bisi kes ngenyit kitu meh (rumah Alexander) kami ngambi bekal ubat tauka berubat.

Esah Sulong.

GAGA KLINIK MIT

“Ungkup ngemuntangka peranak menua, aku minta ngagai perintah ngaga sebuah klinik mit di menua kami tu ngambika Alexander ulih ngerembaika servis iya ngagai peranak menua bukai ti suah berubat kitu,” ku iya.

Baka nya mega enggau Esah Sulong, 60, siku pesakit pedis patung ti madahka lebuh deka ngambi bekal ubat iya bejalai ngena tungkat kelimpah ngenusahka bala anak ti gawa ba mengeri mai iya ngambi ubat ngagai klinik pengerai.

“Ukai semina pedis patung, aku mega napi penyakit kemi manis enggau darah tinggi, suba lebuh deka ngambi bekal ubat aku minta anak ti gawa ba Sri Aman pulai ke menua mai aku ngagai Klinik Pengerai Pantu.

“Diatu takah rumah aku enggau rumah Alexander semina dua minit aja, aku berasai gaga iya nyadi pengari pengerai di menua kami enggau mantu bala ti bukai,” ku iya.

Ungkup penemu penyauh takah rumah Kpg Tuba ari Pasar Pantu urung 35 kilometer.

VOLUNTEER…Alexander (kanan) benung matau pengerai siku pesakit ti datai berubat ngagai rumah iya di Kpg Tuba, Pantu sebedau diberi ubat.
Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak