Jematan repuk ba SK Lubok Ipoh patut dikemanah lengkas

KAPIT: Sekula Primari (SK) Lubok Ipoh minta saup raban bekaul ngemanahka perengka infrastruktur ba sekula ke udah repuk sereta enda likun diguna.

UDAH REPUK..Jematan kayu SK Lubok Ipoh ke patut diganti ngagai jematan besi.

Kepala Pengajar SK Lubok Ipoh, Jimmy Langgong mantaika sebana nya lalu ngarapka raban ke bisi penyiru baka gerempung ukai dikuasa perintah (NGO) sereta pengari rayat ulih gerah jari mantu sida mutarka penanggul nya.

“Kami ba SK Lubok Ipoh tu nadai chara bukai semina ngarapka NGO tauka pengari rayat mantu kami ngemanahka perengkaguna sekula ke pemaik pengajar enggau nembiak sekula tu,” ku iya nerang ngagai Suara Sarawak.

Kenu ku Jimmy, sekula sida diatu berupai amat tinggal pemansang enti dibanding enggau sekula bukai ba pelilih Song.

Ambika chunto, semua sekula ba Pelilih Menua Song ditu udah bisi digaga jematan besi magang tang semina sekula sida bedau digagaka baka nya.

Sida agi nengah jematan kayu ke lama sereta udah repuk. Pekara nya tau bendar ngeruga pengelikun nembiak enggau pengajar ke nengah jematan nya.

“Suah amat kami nganti kayu jematan ke repuk tu tang diatu nya enda alah laban nyau deka semua kayu nya udah repuk,” terang iya.

“Suah amat aku nulis surat nuju sida pengari rayat enggau ejensi ke bukai tang lalu nadai nerima timbal nyentukka sehari tu,”ku iya seraya ngandalka penanggul nya diputarka enggau lengkas.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak