BEJIMAT BA JALAI… Henry Harry Jinep ngelekat topi kelida pengelikun ngagai siku penepan P-Hailing beserimbai enggau Kimpin Meri Penyedar Pengelikun Jalai Raya nyerumba Taun Baru China di KM 6 Jalai Miri-Bintulu, Mosjaya, kemari.

MIRI: Kes aksiden di Miri nurun 16.6 peratus tang kes bebadi nyawa ba jalai alun nambah 2.3 peratus.
Menteri Perengka Pengangkut Sarawak, Datuk Sri Lee Kim Shin madah, kes pemati nambah 11.1 peratus enggau 43 kes pemati ba taun 2022 nambah ngagai 50 ba taun 2021.

“Penusah bebadi dirikod ba taun 2020 iya nya 2,963 kes nurun ngagai 2,471 kes ba taun 2021 tauka 16.6 peratus,” terang iya.

Teks jaku Kim Shin dibacha Menteri Muda Perengka Pengangkut Sarawak, Datuk Henry Harry Jinep beserimbai enggau Kimpin Meri Penyedar Pengelikun Jalai Raya nyerumba Taun Baru China di KM 6 Jalai Miri-Bintulu, Mosjaya, kemari.

Kimpin nya diatur Opis Perengka Pengangkut Jalai Nengeri Sarawak enggau kerejasama Opis Menteri Perengka Pengangkut Sarawak, Sarawak Shell Bhd, PERKESO, Opis Kereja Raya (JKR) enggau Majlis Bandaraya Miri (PBT).
Kim Shin mega madah, kimpin tu sebagi ari inisiatif meri penyedar ngagai bala penguna jalai alun pasal pemesai guna nyaga pengelikun ba jalai alun.

“Taja program sebedau tu ditangguh ketegal Atur Mindah Betagang (PKP) tang tu ukai reti pengawa tu enda ditampung.

“Perintah semampai nentuka bala penguna jalai alun diberi penerang pasal pemesai guna nitihka atur jalai alun sereta nerenak ulah bejimat maya deriba,” ku iya nyemetak madah.

Nambahka nya, program tu nyelinting deriba entukar, penepan motosikal enggau sida ke bekenaka P-Hailing.

“Taja pia, JPJ ke nyadi ejensi penerit adat deka nentuka penguna jalai alun diberi penyedar pasal pemesai guna bejimat maya deriba kelimpah neritka atur enggau tuju nurunka tikas kes aksiden kelebih agi kes bebadi ba jalai alun.

“Atur tu dipejalai nengah program meri penyedar tauka licha pasal pengelikun jalai alun begulai enggau komuniti, institusyen pelajar enggau ejensi perintah sereta peribit,” terang iya.

Kim Shin mega ngarapka semua penguna nentuka entukar diperesa dulu sebedau bejalai jauh nyerumba Pengerami Taun Baru China.

“Tu nentuka pejalai sida lanchar kelimpah beratika pengelikun diri enggau penumpang,” ku iya nerang baru.

Kim Shin ke mega Adun Senadin madah, mensia mayuh mesti merambu pejalai ngambi enda napi pemedis ba jalai sereta seruran nitihka atur undang-undang ba jalai dikena nyeliahka penusah ke enda disadang nyadi.

Suara Sarawak