Kisah tukang kambuh ari Ulu Kemalih, Entabai: Mujan anak Uju

PEMUAS diasuh apai iya nguingka peputan, dia Mujan anak Uju labuh pengerindu ngagai pengawa bekambuhka senyata tajam baka duku chandung, nyabur enggau ilang.

Peranak asal Rumah Giman, Ulu Kemalih di Entabai, kena pegai menua Pakan madahka diri kenyau ari mit rindu meda apai iya, Uju anak Bang ngambuh.

“Nyadi ba pengawa begagaka duku asal kitai Iban tu, aku endang udah bisi minat ari mit suba laban apai aku mega endang orang ti suah begagaka duku.

“Keterubah aku belajar ngaga duku tu pan bepun ari apai aku empu, ke alai lebuh kemisi sekula suba, musin sida apai aku ka belabuh bumai, maya tu mih apai suah ngambuh.

“Laban ke bumai bukit sereta babas bukit, dia apai suah agi mai aku ngambuh ngambi bisi nyaup iya nguingka peputan. Rindang diri lebuh dibai sida apai ngereja pengawa tu.

“Ari nya tadi, ati nyau rindu endar lalu bisi minat deka begaga duku, nunda sida apai,” ku iya ngepunka randau begulai enggau Suara Sarawak.

NERIMA MAYUH PEMINTA… Duku chandung entara bansa duku suah diudar bala pemeli.

BELELANG KE MENGERI

Nikalka kenang diri ku Mujan, udah abis sekula suba, baka orang lelaki Iban bukai mega, iya mupuk belelang laban deka ngiga kereja ke mengeri ti diulih diri.

Iya madah, laban nadai pemandai ba sekula, ka pan enda nyadi kuli china, gawa ngelaban panas begagaka rumah, nyau kemas bekuli makai gaji hari.

“Abis menua sebelah Sarawak ditujah, dia aku lalu nguji enggau orang gawa gaji bulan, kereja ba sebuah kilang besi di indu mengeri Kuching din.

“Datai ba kilang besi, aku lalu diasuh megai pengawa ba tundish tauka nerima ai besi anchur sebedau digaga nyadi besi bukai.

“Taja pia, aku empai diasuh gawa, nyau datai dua tiga lemai. Datai ba kilang semina paskad aja.

“Maya nya mih aku teulihka runding ngaga duku, kena diri empu ke batang endar terubah suba.

“Aku endang nadai berunding deka nyual ngagai sapa-sapa maya nya, tang udah bala kaban meda asil tempa jari aku, dia sida lalu becherita ngagai bala kaban bukai.

“Sida madahka aku landik ngaga duku. Belabuh ari nya mih lalu mayuh peminta ari bala ke sama gawa enggau bala bukai sekumbang dua taun gawa dia sebedau ngetu,” ku iya mulaika pengingat diri.

SUKUNG… Pengajar Resa entara orang ti rinduka keranjai jari Mujan

PULAI KE MENUA

Udah ngetu gawa ba kilang, Mujan mulaika diri ke menua Sarikei ngujungka pengawa begagaka duku pan lalu dilengka laban nyau ngepunka pengawa enggau kompeni bukai.

Kira ba ujung taun 2018, iya gawa enggau orang ngaga jalai besai Pan Borneo, ari simpang KJD ngagai simpang Julau, lalu iya ngasaika pengawa mujur endar.

“Tang dalam ati aku din sigi semampai ka begagaka duku. Dalam bulan March 2020, Atur Mindah Betagang (PKP) pan diterit ketegal pandemik Covid-19.

“Laban enda ulih nurun gawa ketegal atur perintah lebuh nya, dia aku lalu berengkah baru ngambuh duku ngambi bisi kena diri empu kenu ku jaku.

“Kitai sama nemu diatu dunya nadai sekat, dunya ba ujung jari kelebih agi media rama nengah Facebook (FB), bai ati rindu meda abi jari diri empu lalu bantaika aku ba FB, rindu bekunsi enggau bala kaban aja kebendar.

“Lalu berengkah baru mih peminta ari bala ke bisi meda FB aku, bepun ari nya mih aku ngepunka baru pengawa begagaka macham bansa duku nitihka peminta sida.

“Sampai diatu pengawa begagaka duku tu mih nyadika batang pengawa aku, kena ngulihka belanja kami menyanak,” ku iya ti bebini ngambi indu ari Sungai Rusa di Sarikei lalu ngentapka pendiau diri dia.

KUALITI ABI JARI

PUH… Mujan ngaluska sarung duku ngena grain.

Nyadi bansa besi dipilih Mujan endang bansa besi ke kering lalu nadai pilih bukai, semina besi spring kerita, lori enggau 4WD sereta besi spring bukai.

“Laban nya sigi temu kitai bansa besi manah, nyadi aku meli besi spring nya ari kedai besi buruk ke bisi nyual.

“Taja pia, kekadang bisi ga kedai enggai nyual besi nya ngagai kitai lalu rega besi spring nya kira RM5 sekilo,” terang iya.

Ngenang pasal pengawa begagaka duku ku Mujan, enti duku chandung enggau duku penebas, nadai ga lama endar endur pengawa tembu.

Enti sema iya sigi ngaga siti aja, kira tiga hari endur tembu siti set duku chandung enggau duku penebas, tang enti ilang enggau nyabur, endang begunaka timpuh ti lama.

“Abis jampat aku ulih ngaga siti set sebulan endur ilang enggau nyabur ulih tembu.
“Laban mayuh utai ka digaga ba ilang enggau nyabur nya, baka ukir ulu enggau sarung, bansa simpai dikena pan enda sebaka enggau simpai ba duku bukai.

“Pia mega ulu enggau sarung, enti duku chandung jarang ga orang mayuh utai pinta, semina dekaka duku nya makai sereta ulih netak tulang jelu.

“Semina sarung enggau ulu bisi bida laban bisi maya aku ngena kayu import, nitihka gred kayu ke alai bisi kayu gred A, gred B enggau gred C.

“Baka sida ilang enggau nyabur, endang ukir asal kitai Iban empu. Aku enggai ngubah ngena ukir bukai ngambi kelai tauka identiti kitai bansa dipeda serata dunya,” ku iya nampung kenang.

ATI MESTI LIAT

RINDANG… Mujan benung nyinuk ngaluska ulu duku ngena grain.

Baka pengawa nguna pengelandik jari bukai, ngaga duku mega bisi pemar lalu semua nya dikereja enggau pengeliat ati sereta pengepuh.

Ku Mujan, pemar ke ditapi maya ngambuh iya nya dataika ba pengawa kitai nyepuh siti-siti duku.

“Berang, lengan enggau jari jampat endar berasai penat lebuh nyepuh bilah duku.

“Belebuh mega bilah duku nya ta nemu pechah tauka kengkang antu ku sida ke tuai.

“Kekadang patah sereta putus bisi mih bilah duku dikambuh enggau macham penanggul ke bukai ti ngasuh pengawa tau jelungan.

“Bisi maya benung rindang ngambuh tau ta nadai karan lalu ngetu meh pengawa begaga duku nya tadi,” ku iya ngenang utai ti kala nyadi lebuh begagaka duku.

Kereja ti keterubah digaga sebedau ngambuh ku Mujan, iya nya nyukat pemesai enggau pemanjai duku deka digaga, ti nitihka bansa duku mega.

“Nya baru kitai tau mutung bilah besi nya ngena grain sebedau ngepunka pengawa nempa duku.

“Udah tembu tempa, bilah besi deka digrain baru kena nyemelaka mata enggau ngaga langkar duku.

“Tembu nya tadi baru nyepuh bilah duku nya. Udah disepuh lalu grain baru ga mulaika abi chelum, chal mimit aja.

“Enggai nyadi grain endar enggaika sepuh tau lenyau lalu duku nya tau enda makai sereta baka ke nadai sepuh agi lalu tau ngujungka duku nya tadi baka ke enda disepuh.

“Tembu ngambuh baru kitai ngaga ulu enggau sarung duku, ngaga simpai enggau tali tangkin,” ku Mujan ngerintaika pengawa ngambuh duku dataika tembu.

DAGANG LAKU

PENGANDAL… Mujan ngarapka ejensi kraf jari Sarawak ulih mantu kereban kena gawa.

Anak lumur dua ari empat iku diri menyadi nya madah, orang ke minta digagaka duku ukai semina ari Tanah Kenyalang ditu aja, tang mega ari sida ke diau di Semenanjung nyentuk menua Brunei Darussalam enggau Indonesia.

“Naka diatu, peminta endang chukup manah, dataika aku empu nyau enda tegagaka duku diudar sida.

“Tagit aku dalam sebulan, kira bisi 20 bilah duku tembu dikambuh nyengkaum sarung enggau ulu disimpai sereta diukir ungkup nyabur enggau ilang.

“Baka taun tu, udar nyentuk bulan March kira udah penuh, nya pan aku diatu agi ngaga udar orang taun ke udah laban ke enda chukup kereban dikena ngaga ngambi jampat nempa,” ku iya.

Nampung kenang dagang duku ke ujung agi, sekumbang pandemik lalu diatu udah masuk renggat endamik nadai mai mayuh bida ngagai Mujan.

Iya madah, pejalai dagang enggau bekirumka duku diudar orang endang baka selama laban uih dikirum ngena pos tauka servis kargo bas.

“Kitai semina ngatur jam ke engkeman nurun bekirumka barang laban nadai ulih suah pansut lebuh PKP tauka atur bukai diterit maya pandemik.

“Baka diatu dunya nyau likun agi, kira nyamai agi laban nama tembu lalu pos tau kirum aja, kira bedau baka selama mih pejalai dagang aku,” ku iya lalu tuchum.

KEREMBAIKA PENGELANDIK

Mujan bisi amat pengandal ba pengulih besai enggau makit ungkup perengka tajam tauka duku kelebih agi nyabur enggau ilang ti nyadi keresa udu dikelandikka sida ke lelaki.

Ari nya tadi, iya keran mai bala menyadi kitai bansa Iban ti nemu ngambuh anang enggai begagaka duku asal kitai laban peminta chukup mayuh diatu.

“Aku empu suah betanya ngagai kami ke sama ngemeranka pengawa ngaga duku, endang enda kala bisi stok siku bala kami, semua madah nadai magang.

“Ari tu kitai ulih berati, dagang duku nadai ngira bansa duku endang bisi pengulih besai, makit diatu mega ulih dikerembai nengah dagang digital, pelasar media rama ti nadai betatak.

“Tulang aja ditanya, tu mih peluang kitai ulih ngangkatka pengelandik dipeturunka sida ke tuai ngagai kitai rebak kemaya hari, mantaika pesaka dikembuan bansa kitai,” ku Mujan nibarka jaku peransang.

Kelimpah ari nya, iya mega ngelalau bala ke begaga enggau bejualka duku mesti ngereja pengawa enggau ati angkun sereta lurus lalu anang ngayahka bala ke meli.

“Ba sebarang pengawa, ati kitai mesti angkun sereta lurus, anang beambi ulih laban nya ukai semina tau ngamahka nama nuan aja tang bala ti ngemeranka pengawa sebaka.

“Anang sesekali ngelebu ati enggau ngemulaka orang ke meli laban sida udah andalka nuan ulih ngereja pengawa ti manah, nya kebuah sida berani ngudar ari nuan.

“Ba aku empu, iya ti lumur satu endang kualiti duku mesti manah. Pemanah enggau pengelasan sarung enggau ulu nya ti lumur dua,” ku iya madah nyemetak.

MINTA SAUP PERINTAH

Juluk ati Mujan endang ngarapka pengawa dikemeranka iya semampai mujur lalu abi jari iya seruran ngemantupka ati semua orang ti meli.

Ari nya tadi ku iya, saup ari opis enggau ejensi bekaul endang beguna amat ngambi pengemeran enggau pedagang kraf jari ulih maju enggau tetangkup peminta makit menua tu enggau menua luar.

“Besai pengarap aku bisi saup ari raban Kraf Jari Sarawak laban tusah ga ka ngaga mayuh dalam sebulan laban enda chukup kereban dikena betukang.

“Enti ulih, aku tetap ka ngemajuka diri ba pengawa begagaka pengelandik jari, ukai semina duku aja.

“Nya kebuah aku arap endar raban ari opis tauka ejensi Kraf Jari Malaysia tauka Sarawak ditu ulih meri bantu ke patut ngagai bala kami,” ku iya nyimpul randau.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak