Lima bot besai udah disedia ungkup Satok napi bah

KUCHING: Lima buah kampung di sitak Satok udah disikap enggau lima buah bot besai ke beungkus RM60,000 dikena napi penusah bah sebarang maya.

Kaban Kunsil Nengeri (Adun) Satok Datuk Ibrahim Baki madahka bekau gaya hari ti enda manah ngagai bulan Februari tu ila sida udah besedia napi engka kes bah deka nyadi ba palan ti dipelabaka berisiko bah.

“Komiti Penyangga Penusah endang udah lama ditu tang sida chakah lebuh musin baka diatu.

“Lima buah kampung ti dipelabaka deka napi penusah bah iya nya Kampung Sungai Maong, Segedup, Kudei Lama, Kudei Baru enggau Kudei Dayak,” ku iya.

Ibrahim bejaku munyi nya rambau ditanya media pengudah nyuaka bantu sebuah bot ngagai peranak Kampung Kudei Lama ditu, kemari.

Ku iya, sebedau tu bisi bot udah diberi ngagai peranak kampung tang bot nya nyangka udah lama tauka enda besai.

“Bot lama semina ngundan tiga ke empat iku aja, bot baru tu ulih ngundan tujuh iku, disikap enggau ijin, jaket pengelikun, speaker bunyi, lampu selait enggau ubat.

“Kelimpah ari nya, kami mega udah ‘booking’ bot orang kampung tauka bot orang berikan ti deka disuwa ngidupka sida ti tasah bah nyema bot besai tu enda chukup.

“Ba lima buah kampung ti disebut aku tadi, pengabis nadai dua bot orang berikan udah diambu dikena napi penusah nya ila,” ku iya.

Iya nangkanka nya, ngarapka peranak ba lima buah kampung tu bela ngadang lalu ngelalau sida pindah ngagai Palan Ngenduh Enda Lama (PPS) maya bah balat.

“Ba PPS kami bisi nyendiaka pemakai, ai irup, ubat enggau perengka bukai ti diguna.

“Kami deka bekerejasama enggau raban marin, polis, bomba, volunteer enggau ke bukai napi pekara tu ila.

“Aku pan nangi mega nyema penusah bah baka di Semenanjung nyadi ditu,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak