BEJIMAT BA JALAI ALUN… Aidi disempulang bala bukai bejadika Pengawa Ngelanchar Ops Selamat Ke-17 beserimbai enggau Pengerami Taun Baru China 2022 di Farley Mall Batu 6, ensanus.- GAMBAR Mohd Alif Noni

KUCHING: Sepenyampau 750 pegawai enggau raban polis deka gawa maya Ops Selamat Ke-17 beserimbai enggau Pengerami Taun Baru China 2022 bepun 28 Januari nyentuk 6 Februari tu.

Kepala Polis Sarawak Datuk Aidi Ismail madah, semua raban polis nya deka dianjung gawa ba 56 palan dipilih kelebih agi ba endur ke suah ngerikod kes bebadi nyawa ba jalai alun.

Ku iya, operasyen nya dikena nurun kes bebadi nyawa ba jalai alun di Sarawak sepemanjai timpuh pengerami enggau neritka atur undang-undang ba jalai alun.

“Pengawa tu dikena nyaga pengelikun bala penguna lebuh netapka pegawai enggau raban polis di 56 palan dipilih baka endur ke suah ngerikod kes bebadi nyawa ba jalai alun.

“Operasyen tu mega dikena nagang penyalah nyerungkai rumah ti ditinggal lebuh pulai kemisi baka bejalaika pengawa nginau nentuka rumah enggau kedai nya likun,” terang Aidi.

Aidi mansutka jaku nya ba aum pemberita pengudah bejadika Pengawa Ngelanchar Ops Selamat Ke-17 beserimbai enggau Pengerami Taun Baru China 2022 di Farley Mall Batu 6, ensanus.

Nambahka nya ku iya, pegawai enggau raban polis ti gawa deka nyaga pengelikun penguna jalai alun enggau nentuka rumah ti ditinggal nya likun.

“Serak tu, Ops Selamat deka fokus ba jalai Perintah Besai, jalai nengeri enggau jalai mengeri kelebih agi ba 56 jalai ti dipilih suah ngerikod kes bebadi nyawa ba jalai alun enggau jalai sekut,” terang iya.

Ungkup rikod, ari 56 palan ti suah ngerikod kes bebadi nyawa ba jalai alun, 36 nya jalai Perintah Besai seraya 20 agi nya jalai nengeri.

Nambahka nya, komuniti China mega deka ngintu Pengerami Taun Baru China kena 1 Februari tu.

Suara Sarawak