DATUK SERI FATIMAH

KUCHING: Menteri Pemansang Orang Indu, Anak Mit enggau Pengelantang Mensia Mayuh, Datuk Seri Fatimah Abdullah nerima manah pakej Bantu Khas Sarawakku Sayau (BKSS) 8.0 ti beungkus RM285 juta, kemari.

Ku Fatimah, BKSS 8.0 ti dibantaika Kepala Menteri Datuk Patinggi Tan Sri Abang Johari Tun Openg nya ulih nyaup ngelempung tating penusah rayat ketegal pengerekai Covid-19 ba menua tu.

“Inisiatif ari Perintah Sarawak nya seriris enggau pengawa muka sektor ekonomi enggau pekara rama nengah Pelin Strategi Pemansang 2030 Lepas Covid-19 (PCDS 2030),” terang iya, kemari.

Adun Dalat nya mega madah, Perintah Sarawak meri diskaun bil kuasa karan sereta ai ke deka meri pemaik ngagai 647,000 ruang bilik nengah tujuh inisiatif dibantaika Abang Johari dikena mantu rayat.

“Pia mega, inisiatif meri diskaun 50 peratus suwa Skim Berumah Kaunsil Pemansang Pengawa Berumah Sarawak (HDC) penyampau RM 2.6 juta.

“Sama mega Pedagang Mit enggau Jelan Pemesai (PKS) dikelaung ari mayar suwa ti bisi kedai diempu badan berkanun enggau serikat GLC menua,” ku iya nerang.

Nambahka nya ku Fatimah, Perintah Sarawak betatika nasip pedagang lebuh meri diskaun 50 peratus suwa pasar enggau kedai Raban Bekuasa Menua (PBT) seraya bantu duit sekali terima RM500 deka diberi ngagai operator penambang, operator van penumpang, deriba teksi sereta operator bas enggau van sekula.

Ku iya, perintah mega meri geran khas sekali terima penyampau RM1,000 ngagai 87,500 pedaja enggau pedagang mit berejister enggau PBT ngena agih belanja RM87.5 juta.

Fatimah mega madahka bantu nya ulih mantu ngelempung tating belanja rayat taja pen bantu ti diberi nya ukai wang tunai.

“Nengah BKSS 8.0 tu, kitai meda perintah mega meri bantu duit iya nya geran khas penyampau RM1,000 sekali terima ngagai 87,500 pedaja enggau pedagang mit berejister enggau PBT.

“Bantu enggau diskaun tu nunjukka Perintah GPS nya perintah ti siruka nasip rayat,” ku Fatimah.

Suara Sarawak