BASA KEPENUDI…Dr Johnical Rayong (dua kiba) enggau Datuk William Nyalau (dua kanan) maya datai meri basa kepenudi ngagai niang Datuk Simon Dembap Maja di Tabuan Jaya, Kuching, tadi. Bela bisi dipeda Jimmy Simon (kiba).

ENGKILILI: Ex-Sapit Kepala Menteri (DCM) Sarawak Datuk Simon Dembab Maja, 85, udah midang ba sebuah sepital peribit ba Kuching urung pukul 4 lemai kemari.

Nitihka penerang ari anak iya, Jimmy Simon, pemidang niang apai iya ke mega siku ari raban pemungkal Parti Pesaka Bumiputera Bersatu (PBB) tu dipelabaka ketegal penyakit riman prostat ti laun ditemu.

Pemidang niang ninggalka siku balu, Datin Rosalind Sitie Jemeni, tiga iku anak, tiga iku uchu enggau dua iku ichit.

“Niang tu siku orang ti bekempit bendar ba pengawa politik lalu berengkah ngepunka pengawa politik kenyau ari taun 1970 kelia.

“Maya nya mih niang keterubah iya enggau orang bediri minta pilih ba pengawa bepilih menua Sarawak ti ngarika Parti Pesaka,” ku tusui Jimmy maya dirandau Suara Sarawak, lemai tadi.

Nangkan ke nya, ku Jimmy, bekau ari pemujur bediri minta pilih dia niang terus dipadu nyadi Sapit Kepala Menteri Sarawak ba taun 1970 ba baruh Perintah Besatu Sarawak ti ditumbuhka ari serakup Parti Bumiputera, Parti Pesaka begulai enggau Parti Sa’ati Rayat Sarawak (SUPP) numbuhka perintah Sarawak.

“Sebedau niang masuk politik, niang gawa nyadi siku Pemesai Pekara Sekula ba Kaunsil Pelilih Engkilili.

“Niang mega kala besekula ba Sekula Chung Hua enggau Sekula St Thomas di Kuching.

“Nya kebuah, niang chukup landik nulis enggau bejaku China sereta landik bejaku dalam seling jaku Khek/Hakka, Hokkien enggau Teochew,” ku Jimmy.

“Kami sebilik chukup berasai sinu sereta puang sepengudah ditinggalka niang laban iya tu siku apai ti siru sereta mentas enggau bini anak diri,” ku sebana Jimmy.

“Semua kitai ba Sarawak ditu patut berakup lalu begulai manah nadai ngira bansa ngemansangka menua kitai Sarawak tu.

“Laban enti nyau bepechah, orang menua bukai di luar Sarawak nyamai deka ngemeli sereta ngelabuhka kitai,” ku lalau Jimmy.

Ku Jimmy mega, niang apai iya deka diintu lalu disenggai ba rumah sida empu ba Engkilili sereta dikuburka ditu.

Berebak enggau nya, Kaban Kunsil Nengeri (Adun) Engkilili Dr. Johnical Rayong Ngipa enggau Ex-Kaban Parlimen Lubok Antu Datuk William Nyalau Badak bisi datai ngabas meri basa kepenudi ngagai sida niang sebilik.

Kenu ku Rayong, pemidang niang siti pengelenyau besai ngagai rayat Sarawak lebih agi ba rayat ba sitak Engkilili.

“Aku empu endang ngelala niang ari mit laban niang indai aku selalu dipeda aku bepantun ke niang lebuh bisi ngatur program tauka pengerami ba Skrang Skim.

“Reti nya, niang endang siku tuai ke amat siruka rayat enggau bebendar ngemansangka rayat.

“Nya alai, aku ngarika semua rayat di Dun Engkilili ngenataika penyinu ati ngagai sida niang sebilik,” ku iya.

NIANG DATUK SIMON DEMBAP MAJA

Suara Sarawak