DATUK JOSEPH SALANG

KUCHING: Parti Rakyat Sarawak (PRS) dipelaba deka milih presiden baru ba Aum Delegit Tiga Taun Sekali (TDC) kena bulan Mei tu ila.

Pemangku presiden PRS, Datuk Joseph Salang Gandum madah, raban sida udah netapka haribulan 7 Mei 2022 bepalan ba Sibu endur aum besai nya pengudah ke ditangguh dua kali ketegal pandemik Covid-19.

“TDC serak tu endur milih pangku pengawa nyadi presiden, sapit presiden, bala mandal presiden enggau kaban komiti supreme kaunsil.

“Nya tuju besai TDC,” ku iya ba aum pemberita pengudah betuaika Aum Supreme Kaunsil PRS, ditu kemari.
Ungkup penemu, penuduk presiden PRS puang bekau pemidang niang Sapit Kepala Tan Sri Tan Sri Datuk Amar Dr James Jemut Masing kena 31 Oktober taun nyin kemari.

Kenu ku Salang, sebedau TDC nya diatur, raban sid audah ngasuh semua 32 pampang PRS ngatur aum besai enggau milih penuduk dikedeka diri.

“Tu beduduk ari taun-taun sebedau tu, pampang parti semina ngatur Aum Besai Ninting Taun (AGM) tang nadai bepilih ungkup pangku pengawa.

“Nya alai, serak tu kami deka milih orang ke mangku pengawa baru nengah chara nganjung pengari ba TDC nya ila,” ku iya.

Nangkan ke nya, bepelasarka kunstitusyen parti, sesebengkah pampang mesti ngembuan kaban ke chukup baru ulih nganjung deligit.

“Nyema sida nadai tetangkupka penyampau nya, nyadi sida enda ulih nganjung delegit tang semina ulih nganjung orang nyadi pengemata,” ku iya.

Maya ditanya sekalika delegit TDC ulih nganjung nama chalun ungkup penuduk presiden, Salang madah sida dikemendar bejalaika nya.

“Pengawa nganjung chalun ila ari pampang enggau sida ke nganjung chalun sapa ke diperambu nyadi presiden, sapit presiden.

“Nyadi, semua nya tepulai ngagai kaban komiti,” ku iya seraya madah aum nya endang keterubah diatur pengudah tembu Pengawa Bepilih Besai Nengeri Ke-12.

Suara Sarawak