Datuk Roland Sagah Wee Inn

KUCHING: Sekula Primari (SK) Long Bemang udah dikemendarka nerima agih belanja ba baruh Projek Sekula Repuk RM1 billion enggau ungkus projek RM6 juta ti ditindaka ba taun 2021.

Menteri Pelajar, Inovasyen Enggau Pemansang Penau Datuk Roland Sagah Wee Inn madahka ketegal nadai orang nangkup tinda, projek nya deka ditindaka baru bulan Februari 2022.

“Aku bisi nanyaka berita kes nembiak ti labuh nya ngagai Adun Telang Usan Dennis Ngau.

“Iya (Adun Telang Usan) madahka nembiak ti labuh ari tempuan SK Long Bemang iya nadai napi bakal balat lalu udah dikemendarka pansut ari sepital,” ku iya dalam siti penerang media kemari.

Pagi kemari, ayan ba media rama siku nembiak ari SK Long Bemang diripotka labuh ari sebuah tempuan di sekula ti udah repuk.

Taja pia, Tuai Polis Pelilih Menua Marudi Deputi Superitendan Mohd Ruslan Mat Kib lebuh ditanya madahka sida nadai nerima sebarang ripot bekaul kes tu.

Media rama madahka nembiak beumur semilan taun nya udah labuh ari tingkat satu urung pukul 10 pagi taja pia indai nembiak nya madahka anak iya nadai balat bakal.

Suara Sarawak