BEJADI…Datuk Sharifah Hasidah Sayeed Aman Ghazali (dua kiba) ngetas riben kelai bejadika pal benchi dadah dientak ba mua Balai Mensia Mayuh Kampung Lintang ditu, kemari.

KUCHING: Sarawak deka terus nuntut sekeda hak ti dirintaika ba baruh Sempekat Malaysia 1963 (MA63) enggau Ripot Komiti Entara Perintah (IGC) dalam pengawa mulaika hak menua ti lenyau.

Menteri Muda Ba Opis Kepala Menteri(Undang-undang, MA63 enggau Kaul Sarawak-Perintah Besai) Datuk Sharifah Hasidah Sayeed Aman Ghazali madahka pekara nya mesti diperambu sereta diatur enggau manah.

“Pekara tu mesti diaduka laban rayat udah meri mandat besai ngagai kitai ngambi baru hak ti udah lenyau ngagai Sarawak.

“Kitai deka neruska pengawa nya, nya kebuah Kepala Menteri ngaga sebuah portfolio khas ngatur MA63 awakka semua hak kitai ti dirintaila ba baruh MA63 enggau IGC kelebih agi Konstitusyen Perintah Besai dipulaika ngagai kitai baru,” ku iya.

Sharifah Hasidah bejaku munyi nya lebuh ditanya pemberita pengudah Bejadika Program Solidariti Nembiak 2022 Ngelayo Bersama Belia di Kampung Sungai Bedil enggau Kampung Lintang di Balai Mensia Mayuh Kampung Lintang ti diatur Ejensi Benchi Dadah Nasional (AADK) ditu, kemari.

Ku iya, rintai hak tu deka dipadahka siti-siti nyema semua pekara nya udah diadu manah.

Nangkan nya, iya madahka sida berasai teperansang ketegal pekara MA63 udah dikemendarka dalam Aum Parlimen apin lama.

“Aku beterima kasih ngagai Perintah Besai enggau kaban parlimen ti udah nyukung kitai ngatur ubah nya.

“Tu nunjukka Perintah Besai enggau kaban parlimen meretika pengawa kami enggau meretika nama utai ti disebut MA63.

“Pekara ti dipinta kitai nya sigi hak kitai, kitai nadai minta lebih tauka kurang,” ku iya.

Iya nyemetak madahka Perintah Sarawak semina minta ngambika hak ti lenyau nya dipulaika baru.

“Tu meh isi pekara ti deka dipinta kitai lalu kitai andalka Perintah Besai enggau kaban parlimen meri semangat solidariti sereta meretika pekara nya,” ku iya.

Suara Sarawak