Sarawak dudi hari bepanggai ba orang biak
Abang Johari benung bejaku chara virtual nyerumba program Pengering Nengah Penyerakup, Kaul enggau Timbal Responsif (Sada) Yayasan Perpaduan Sarawak (YPS) ditu, kemari.

MIRI: Raban orang biak ba Sarawak ditesau nyikap diri nyadi ketuai laban pemansang nengeri tu dudi hari bepanggai ba sida.

Kepala Menteri Datuk Patinggi Tan Sri Abang Johari Tun Openg madah, nya alai sida bejalaika tanggungpengawa diri ngerebut peluang disedia endur ngiga penemu enggau pengelandik.

“Malik ngagai pemansang ke digaga enggau dilanggur Sarawak nyentuk 2030, raban orang biak deka bejalaika tanggungpengawa ke lebih beguna.

“Sepuluh taun agi, sida ke lebih biak deka ulih ngundi.

“Sida ke biak nyadi reta dudi hari nyadi sida mesti sedia, sanggup enggau patut ngerembaika penemu enggau pengelandik ngagai tikas ke lebih besai dikena nangkup peminta jeman baru nyengkaum ekonomi digital.

DATUK PATINGGI TAN SRI ABANG JOHARI

“Tu endang chara baru dikena ngatur diri, rayat enggau menua ngena teknologi moden,” ku iya.

Iya madah munyi nya nengah jaku iya ke diayan nengah chara virtual nyerumba program Pengering Nengah Penyerakup, Kaul enggau Timbal Responsif (Sada) Yayasan Perpaduan Sarawak (YPS) ditu, kemari.

Nangkan ke nya, raban orang biak mesti sedia enggau berani gawa ngagai utai ke dikeingin sida ba dunya besai enggau nadai beadan tu laban mayuh peluang bisi disedia.

“Patut nemu, ba jeman baru diatu, semina sida ke nyulut, , inovatif, panjai runding, ngembuan tinjau enggau berani deka nyingkang lebih jauh sereta terus maju baka pedagang China Jack Ma, ke mungkal Alibaba.

“Kitai mega deka orang biak panjai runding baka tu enggau nengah tu, Sarawak dudi hari ila deka nyadi lebih manah laban diberi pengelantang enggau penyenang ke lebih manah.

“Aku diatu nyadi Kepala Menteri, tang aku majak tuai enggau bisi maya ila deka nyerahka tanggungpengawa tu ngagai orang biak. Nyadi kita mesti sedia enggau ulih nyaga semua rayat enda ngira pengarap enggau bansa.

“Aku andal kitai ulih ngereja nya. Nya alai, bala anak kitai patut sedia enggau dilatih…chunto iya ba taun 2030, sida ke diatu beumur lapan enggau 10 taun, deka beumur 18 ngagai 20 taun lalu sida udah ulih ngundi sereta nentuka kuing menua Sarawak,” ku iya.

Berebak enggau nya, iya muji program Sada YPS laban engkeman enggau polisi perintah Sarawak ke mungkur semua sereta ngaku sada rayat nyengkaum raban orang biak.

“Tuju program tu awakka lebih mereti ke pemesai guna enggau penau orang biak nengah randau pemansang Sarawak.

“Pelasar tu mega nyendiaka ‘sada’ ungkup orang biak bekunsika penemu diri pasal pekara ke diguna sida ba perintah enggau patut diperundingka perintah dalam ngaduka polisi,” ku iya.

Suara Sarawak