ADAM PRAKASH ABDULLAH

KUCHING: Serakup Pengajar Sarawak (STU) nerima manah penemu ti dipansutka Menteri Besai Datuk Seri Ismail Sabri Yaakob pasal semua pengajar diatu dikemendar bepolitik.

Presiden STU Adam Prakash Abdullah madahka bala pengajar mega rayat ti ngembuan hak ngundi enggau patut diberi peluang madahka penemu enggau penerang sida bekaul politik menua.

“Kami suah ninga bala pengajar diberi jaku tangkan ari orang atas pasal kaul sida dalam politik.

“Nya alai, nengah gaya tu kitai ngarapka pekara nya muka ruang ngagai pekara demokrasi penuh ari rayat,” ku iya dalam siti penerang media, kemari.

Ku Adam, STU mega ngarapka semua pengajar di Sarawak nerima manah jaku ti dibantai Menteri Besai nya enggau penuh tanggung pengawa sereta seruran ngingatka penuduk diri nyadi siku pengereja pengawa perintah.

“STU ngingatka semua raban nyengkaum pengajar di Sarawak ngambika nitih atur enggau ‘pekeliling’ servis ti dikeluarka sebarang maya.

“Pengajar patut meri perati penuh ngagai pengawa nyadi siku pengajar enggau nyadi teladan ngagai mensia mayuh dalam kaul politik,” ku iya.

Ku iya, nyadi siku pengereja pengawa perintah, pengajar mesti meri penerang enggau penemu ngagai mensia mayuh bekaul polisi perintah kelebih agi di Sarawak ti seruran ngelakuka pengelantang rayat.

“STU ngelalau semua raban pengajar seruran nitihka atur ari Opis Pelajar Negeri (JPN) enggau Opis Menteri Pelajar (KPM) pasal kaul dalam politik.

“Kelimpah ari nya, STU andalka JPN enggau KPM meri ruang ngagai pengajar bepolitik laban sejarah politik nunjukka raban politik tebal agi raban ex-pengajar.

“Kami ngarapka nadai agi isu bekaul ‘ukum’ ngagai pengajar bepolitik di Sarawak seagi iya nitihka atur ti udah diberi,” ku iya.

Suara Sarawak