AGIH BELANJA…Harden (enam kiba) meri agih belanja RTP RM500,000 dikena nyeruri Tepikong Ciyun.

SRI AMAN: Tepikong Ciyun ti digaga ba tengah projek Waterfront Sri Aman deka diseruri ngena agih belanja RM500,000.

Menteri Muda Pelajar, Inovasyen Enggau Pemansang Penau ll ti mega Adun Simanggang Datuk Francis Harden Hollis madahka projek nyeruri tepikong tu nguna agih belanja ari Program Transformasyen Menua Pesisir (RTP) taun 2022.

“Bagi pengawa ngatur Pesta Cahaya (Lantern Festival) ti diatur Gerempung Soon Heng, aku meri bantu RM20,000 ari agih belanja Projek Mit Pemansang Menua Pesisir (MRP).

“Bantu nya diberi kena kita ngatur mayar ungkus ngatur pengawa Pesta Cahaya nya,” ku iya lebuh ngatur aum khas enggau raban pengatur Gerempung Soon Heng Simanggang kena 20 Januari tu tadi.

Dulu ari nya, gerempung tu ngelaluka Harden bagi ngerandau isu nyeruri sebagi ari kompenen Tepikong Ciyun.

Ku sida, pengawa nyeruri tepikong nya begunaka belanja tambah dikena nampung pengawa ngemanahka tepikong.

Ba aum sama mega, gerempung bisi berandau minta agih belanja ngatur Pesta Cahaya ke alai pengawa tu ila deka diatur nitihka Atur Pengawa Standard (SOP) nagang pengerekai Covid-19 taja pan Sarawak udah ngalih ngagai Renggat 4 Pelin Penyuman Menua (PPN).

Kelimpah ari nya, Harden diberi basa bejadika pengawa muka ‘Langkau Petara Tanah’ ti diseruri ba Tepikong Ciyun.

Sama bisi datai Temenggong Kueh Aik Seng enggau bala bukai.

Suara Sarawak