Tepulai ngagai BN nerima PBM

KUCHING: Tepulai ngagai supreme kaunsil Barisan Nasional (BN) nentuka kerjasama enggau Parti Bangsa Malaysia (PBM), ku Menteri ba Opis Menteri Besai (Parlimen enggau Undang-undang) Datuk Seri Wan Junaidi Tuanku Jaafar.

Kenu ku tuai Gempung Parti Sarawak (GPS) nya, kebuah pia laba pekara nya nadai kaul enggau GPS lalu tepulai ngagai dua buah parti nya sekalika deka bekerejasama tauka enda.

“GPS ukai BN lalu tejuka BN nentuka kediri aum entara sida…sekalika sida setuju, nerima tauka enda.

“Ba kami, tu siti pekara independent lalu hak sida sekalika setuju tauka enda.

“Pia mega enggau Presiden PBM ke mega Kaban Parlimen Julau Larry Sng, sekalika iya deka diterima tauka enda bekerejasama enggau BN.. .nya endang jak iya minta ngagai BN,” ku iya.

Iya madah munyi nya lebuh dipinta nimbal penerang dipansutka Larry pasal nyangka deka bekerejasama enggau Barisan Nasional (BN) nyema engkeman enggau kuing tuju parti PBM, ba Kompleks Mahkamah Kuching, kemari.

Udah nya, Wan Junaidi ke mega Kaban Supreme Kaunsil Parti Pesaka Bumiputera Bersatu (PBB) ngasaika penumbuh PBM endang sebagi ari atur demokrasi.

Nya alai, ku iya penumbuh parti politik baru ke diiring Larry nya ukai nyadika penanggul laban Malaysia ngemeranka atur independent enggau demokrasi dalam politik.

“Kitai patut ngemendarka mayuh agi orang ngemeranka atur demokrasi sereta bulih demokrasi ari rayat.

“Kebuah pia laban dudi hari ila, sukung ari rayat deka nentuka kitai (parti) ulih neruska parti nya lalu pekara nya agi idup tauka enda,”ku iya.

Sebedau tu, Larry dipadu nyadi Presiden PBM lalu nerang ulih nyadi pilih ke baru rayat pupu bansa nengah gempung BN enggau ulih menang mayuh kerusi ba Sarawak, Semenanjung enggau Sabah.

Rintai tuai baru PBM ngemataka bisi 25 iku dipadu mangku tanggungpengawa lalu lima ke bukai mungkur pengawa nyadi Sekretari Besai, Sapit iya, Tukang Wang, Tuai Pemadah enggau siku kaban Supreme Kaunsil deka dichiri Presiden parti.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak