Ubah konstitusyen PBB deka diputuska maya TGM
DATUK SERI ABDUL KARIM

ASAJAYA: Adun Asajaya Datuk Seri Abdul Karim Rahman Hamzah madahka sida agi nganti ubah konstitusyen Parti Pesaka Bumiputera Bersatu (PBB) bekaul isu numbuhka sayap khas ngagai raban biak 18 nyentuk 28 taun.

Ku iya, sida agi nganti nama ubah ti deka diputuska rambau Aum Besai Tiga Taun Sekali (TGM) PBB ti dipelabaka deka diatur bulan June tu ila.

“Tang peminta parti jam diatu iya nya nitihka konstitusyen ti udah bisi bagi ranting enggau pampang PBB di serata Sarawak ngatur aum besai tiga taun sekali sida iya.

“Kami mega deka ngatur aum nya ba renggat pati, udah nya ba renggat pampang baikka deka ditumbuhka sayap kediri, kitai agi nganti nama ubah ti deka digaga,” ku iya.

Iya bejaku munyi nya ngagai pemberita ba aum media pengudah Program Makai Selamat enggau Program Meri Basa Penyulut Pengawa Bepilih Besai Nengeri (PRN-12) Sarawak N.15 Asajaya di Kompleks Lumba Asajaya, ditu kemari.

Nerang silik agi pasal sikap raban biak Asajaya, Abdul Karim madahka sida nadai napi penaggul tu besai enggau raban biak di sitak nya.

“Pekara ti patut digaga ungkup raban biak beumur 18 nyentuk 30 taun, sida patut bisi minat ngagai bakani sebuah perintah diatur enggau ditumbuhka.

“Laban maya diatu ati raban sida nya enda entu minat ngagai politik, tang sida sigi deka datai sereta nyereta semua aktiviti ti diatur kami baka aktiviti tauka program lumba enggau e-lumba,” ku iya.

Dulu ari nya, Kepala Menteri ti mega Presiden PBB Datuk Patinggi Tan Sri Abang Johari Tun Openg madahka deka numbuhka sayap baru khas rambau aum media pengudah Aum Besai Kaunsil Supreme PBB Ke-13, kena 9 Januari.

Ku iya, sebedau numbuhka sayap baru nya, konstitusyem parti mesti diubah dulu.

Suara Sarawak