DINGA MANAH… Uggah bejaku ba mua bala mayuh rambau Aum Tiga Taun Sekali Pengari PBB Pati Kubal Ulu di Rumah Panjai Mendit Unsu ba Penom, ensanus.

BETONG: Padahka peminta, beterus terang ngagai pengari rayat (YB) pasal juluk rayat bekaul pemansang enggau bantu ngintu pengelantang.

Nya entara pekara dikemerat Sapit Kepala Menteri Datuk Amar Douglas Uggah Embas ti dekaka tuai renggat baruh mai sada rayat datai ngagai supreme kaunsil menua.

Ku iya, semua tuai renggat baru anang malu meri timbal ngagai pengari rayat sida pasal juluk rayat bekaul program pemansang enggau bantu ngintu pengelantang.

“Kami (perintah) begunaka timbal sereta peminta nya ngambi dibantai ngagai raban tuai menua tu.

“Perintah ke diatu chukup ngemeratka aktiviti ke tau nyungkak penatai pemisi rayat menua pesisir nengah bemacham pengawa betanam betupi.

“Kelimpah ari nya, kami mega bisi bejalaika program dikena mantu raban diselinting,” terang Uggah.

Adun Bukit Saban mansutka jaku nya ba Aum Tiga Taun Sekali Pengari PBB Pati Kubal Ulu di Rumah Panjai Mendit Unsu ba Penom, ensanus.

Ngelansa pasal pengundi biak, iya minta raban parti chakah bejalaika pengawa dikena negapka penuduk GPS.

“Inisiatif tu nyengkaum matak mayuh agi nembiak beumur 18 taun enggau tuai ari nya nyadi kaban ke deka negapka agi sukung ngagai perintah,” ku Uggah.

Nya alai, Uggah ngarapka rayat pintar beratika pekara kea mat enggau enda beduduk ari raban penyakal suah ngerembaika berita bula.

Suara Sarawak