Lulong begulai enggau siku model anak mit mandangka baju kebaya ke bisi dijual iya.

Baka kenyalang ti tebilang laban tangkung, Sarawak mega tebilang nama suah ditimang ngena nama Tanah Kenyalang. Menua tu diuwan mayuh bengkah pupu raban bansa ti kaya enggau adat basa mandangka penyiru pupu bansa.

Tanah Kenyalang ukai semina tebilang enggau pemanah rampa menua chelap ditimpai mata tang kaya mega ari asil kraf jari enggau ngepan ti semampai dipuji diselampur mengeri.

Kebuah pia, laban kraf jari menua kitai tu ngembuan nilai estetika ti tinggi sereta penyelai kediri empu ti mandangka pemanah budaya asal genap pupu raban bansa ba menua tu.

Kraf jari tu iya nya sebengkah pengawa ti begagaka barang pengias tauka perengka ti diguna sereta digaga seratus peratus ngena jari.

Kraf jari ulih digaga ari mayuh macham utai baka leka marik, ubung, rutan, kulit kayu tekalung, kulit jelu, kayu enggau mayuh agi ke bukai.

PRODUK KRAF JARI

Lulong begulai enggau siku model anak mit mandangka baju kebaya ke bisi dijual iya.

Beduduk ari nya, ‘Lulong Ilosha Borneo Handicraft Collection’ iya nya siti kedai ti ngumpul sereta bejualka semua asil kraf jari enggau ngepan pupu raban bansa menua tu.

Kedai tu diempu siku indai tunggal ti chukup bajik baka ‘Lulong’ sereta landik begaya iya nya ibu, Junaidah anak Batu.

‘Lulong’ tu siti nama ti udah lama lekat dalam sejarah bansa Iban. Lulong tu mega nama siku indu ari menua Panggau Libau ti naka iya pemajik ba ensera kitai Iban.
Kelimpah ari nya, nama Lulong mega mandangka pemajik sida ke indu. Nya alai, ibu Junaidah lalu ngena nama ‘Endu Lulong’.

Endu Lulong tu asal ari Serubah Ili, siti rumah panjai ba Sungai Lemanak ti tebilang nama nengah lagu ‘Danji Sungai Lemanak’ ti disadaka penyanyi tebilang kitai Dayak iya nya Hailey Robson.

Bala peminat kraf jari enggau ngepan Tanah Kenyalang sigi enda pulai lebu enti ngelawa kedai tu laban mayuh macham asil kraf jari enggau ngepan raban bansa di menua tu bisi dipandangka ba kedai nya.

Sekeda kraf jari enggau ngepan ti bisi dipandang lalu dijual ba kedai iya baka ngepan Iban, Bidayuh, Orang Ulu, selampai, pua kumbu, baju burung, marik empang, terendak, marik, gelang enggau beg ti digaga ari leka marik, gendang, bakul tambok, terabai enggau mayuh agi ke bukai.

“Kelimpah ari bejualka kraf jari enggau ngepan, aku mega bisi nyendiaka servis mungkus sereta ngias perais tauka buah jari.

“Kita ulih milih kediri empu produk ari kraf jari enggau ngepan ti dikerinduka kita ti deka diberi kita ngagai orang bukai nyadika buah jari.

“Udah nya, aku deka mungkus sereta ngias buah jari nya enggau manah. Naka ke diatu, mayuh bala ari opis perintah baka Opis Pelajar enggau bala bukai begunaka servis aku dikena sida meri buah jari ngagai bala pemesai,” ku Endu Lulong.

Endu Lulong madahka, semua produk kraf jari enggau ngepan tu diangkatka iya ari orang bukai kelebih agi ari sida ba menua Batang Rajang ti chukup landik begagaka kraf jari enggau ngepan.

Ibu bajik tu mega bisi bedagangka baju kebaya ti bemacham chura enggau bungai sereta ulih mancharka pemajik bala indu dara enggau bala indai orang ti bekenaka baju nya.

Baju kebaya tu sigi manah enti digayaka sida ke indu kelebih agi bala indai laban ulih mancharka pemajik sida enda ngira nya maya nurun gawa ke opis, maya pengerami tauka ba pengawa bukai.

Enda nyalah-nyalah munyi ku lagu ari siku penanyi kitai Dayak ti tebilang iya nya Leez Zwita nengah lagu iya ‘Bajik Tuai’, pemajik bala ibu enti bekenaka baju kebaya nya tau ngasuh ati bala aya gegitik sereta bepurus dada.

Nambahka nya, ku iya, bala mayuh ti bisi ati tauka rinduka produk kraf jari, ngepan enggau baju kebaya ti dijual iya tauka servis mungkus enggau ngias buah jari iya ulih betanya ngagai iya ba lumur telefon 011-14030446.

Bala mayuh mega diperansang ngelawa Facebook iya ‘ENDU LULONG’ tauka ba page ‘Lulong Ilosha Borneo Handicarft Collection’ sereta ba tiktok @lulongilosha.

DAGANG KRAF JARI

Kedai Endu Lulong di Medan Niaga SEDC, Sri Aman.

Lebuh dirandau senentang pengawa ngepunka dagang tu, Endu Lulong madahka pengawa dagang ti dipejalaika iya tu sigi bepun ari pengerindu iya ngagai asil kraf jari enggau ngepan pupu raban bansa menua tu sereta ari peransang bala bakih iya mega.

“Maya agi dara suba, aku sigi rindu meda kraf jari enggau ngepan pupu raban bansa menua kitai kelebih agi kitai bansa nyentuk ke diatu.

Kraf jari enggau ngepan menua kitai ngembuan penyelai kediri empu ti nadai ba kraf jari enggau ngepan menua bukai sereta chukup manah ditimpai mata,” ku iya.

Sebedau iya muka kedai diri empu bejualka kraf jari, ngepan enggau baju kebaya, Endu Lulong semina nyadi ‘dropship’ aja mantu kaban iya bedagangka baju kebaya dikena ngisi maya lepa.

Nyau kelama udah nya, iya pan lalu bisi ati deka muka kedai kediri empu lalu diumbaka pengerindu iya ngagai kraf jari enggau ngepan sereta peransang ari bala bakih iya. Nya alai iya lalu numbuhka siti kedai ‘Lulong Ilosha Borneo Handicraft Collection’ ba taun 2020.

Kedai tu nyamai ditapatka mensia mayuh laban sigi bepalan ba tengah-tengah bandar Sri Aman iya nya ba Ringkat 1, bagunan Medan Niaga SEDC Sri Aman.

PENGUJI MAYA BEDAGANG

Entara pemeli ti datai meli produk kraf ari Lulong

Lebuh kitai bejuraika pengawa dagang, penguji maya ngepun tauka ngemansangka pengawa dagang tu sigi udah nyadika asam garam dalam dunya dagang. Pia mega, pengawa dagang Endu Lulong enda tinggal nempuh penguji nya.

Nitihka penerang ari iya, penanggul enda chukup puku dikena ngepunka pengawa dagang nya siti penanggul ti ditapi iya.

Taja pia, ari pemanah bala bakih iya ti sanggup mantu nyendiaka puku lalu meri pemujur ngagai iya numbuhka Lulong Ilosha Borneo Handicraft Collection.

Penguji bukai iya nya enda chukup penemu dikena ngatur pengawa dagang.

Lebuh bekempit ba pengawa dagang, kitai patut ngembuan penemu, pemintar enggau peneleba ngatur pengawa nya ngambika dagang kitai ulih besemekih enggau orang bukai.

Empas ari pemanah kaul enggau bala bakih, Endu Lulong ukai semina dibantu bala bakih iya ari sukut modal lalu diajar sereta diberi penemu dikena ngemansangka diri ba pengawa dagang tang mega nulung ngelakuka produk dagang iya.

Maya ngepunka dagang iya ba bulan Ogos 2020, menua kitai maya nya benung rabat dituntung pengelekai penyakit Covid-19 lalu atur perintah betagang (PKP) mega benung terit dipejalaika.

Pengawa dagang iya enda tinggal kena empas ari pandemik nya. Laban ti baru ngepunka pengawa dagang sereta empas ari pandemik nya, iya irau ati laban enda nmu tunga tuju dagang iya ba maya ti deka datai.

Pengeransing enggau pengeliat ati iya napi semua penguji nya ti ngujungka pengawa dagang iya mujur dipejalaika nyentukka diatu lalu mayuh nerima timbal ari bala pemeli diselampur Sarawak, Sabah enggau Semenanjung. Diatu iya udah mayuh bala dropship kediri empu ti mantu iya ngelakuka produk dagang iya.

JULUK ATI JEMAH 

Entara pemeli ti datai meli produk kraf ari Lulong

Maya dirandau Suara Sarawak, Endu Lulong madahka juluk ati iya deka ngerembaika pengawa dagang iya lalu muka mayuh agi pampang ba endur bukai ba menua kitai ditu.

Kenu ku Endu Lulong, dagang kraf jari enggau ngepan ngembuan potensi ti besai ba maya ti deka datai enti dikerembaika enggau manah.

Laban diatu mayuh orang majak ngelala lalu rinduka kraf jari enggau ngepan pupu raban bansa menua tu.

Naka ke udah, enti diperatika enggau nyemetak, bala mayuh rindu nyimpan kraf jari enggau ngepan nyadi siti keresa lama laban utai tu majak berega enti majak lama.

Pia mega,suah dipandang lebuh maya pengerami melah pinang enggau pengerami bukai, ba pengawa begambar sereta ba dunya fasyen kemaya hari, kraf jari enggau ngepan kitai menua tu majak nerima timbal ti manah.

Iya mega bela nesau bala orang indu kelebih agi indai tunggal ba luar dia ti landik begagaka kraf jari tauka ngepan ngambika bela ngerembaika pengelandik jari diri lalu bedagangka produk sida laban nya siti chara sida ulih nyungkak penatai pemisi ngagai diri empu enggau ruang bilik diri.

Ngena awak tu, Endu Lulong madahka diri meri besai terima kasih ngagai sida sebilik, anak bujang iya ti semampai mantu iya ba kedai enggau bala bakih iya ti semampai nyadika batang sukung lalu suah nulung iya ba pengawa dagang tu.

MILIH KEDIRI…Baju ngepan lelaki enggau marik empang.

Endu Lulong mega meri terima kasih ngagai semua bala pemeli enggau bala pengikut iya ba media rama baka Facebook enggau Tik Tok ti seruran nyukung sereta manggaika pengandal ati sida ngagai produk kraf jari, ngepan enggau baju kebaya iya.

Berebak enggau pengawa ngagihka bantu nengah BKSS 8.0 tu, Endu Lulong meri besai terima kasih ngagai perintah Sarawak laban ari bantu nya tadi ulih ngelempungka tating belanja sida pedagang PKS enda ibuh bebayarka suwa kedai ti dibuka ba palan dagang dipenggi perintah.

Pengawa tu mandangka perintah menua Sarawak balat ngemeratka raban pedagang PKS baka sida.

Kena nutupka randau diri, Endu Lulong mega meri terima kasih ngagai Suara Sarawak laban udah ngerandau lalu ngemansutka produk dagang iya ba surat kabar Suara Sarawak ngambika ditemu bala mayuh.

Raga digaga ari leka marik.

Suara Sarawak