Sekretari PBDSB Julius Enchana

SIBU: Parti Bansa Dayak Sarawak Baru (PBDSB) deka ngatur pengawa milih pengari parti nya beserimbai enggau Aum Besai Deligit Tiga Taun Sekali (TDC) ti ditaga deka diatur kena 26 March tu.

Sekretari PBDSB, Julius Enchana madah tuju aum nya endang dikena milih kaban Supreme Kaunsil ke baru dikena bejalaika tanggungpengawa parti tu ba maya ti deka datai tu ila.

Tang ku iya, pengawa Presiden enggau Sapit Presiden enda diperebutka lalu mengkang deka diiring Bobby William ti nyadi ketuai parti tu.

“Nyangka deka bisi berubah ba tanggungpengawa bukai ba Supreme Kaunsil PBDSB sepengudah pengawa bepilih parti tu diatur ila.

“Pia mega aku empu enda enggau bepilih berebutka penuduk ba pengawa parti ke sekali tu.

“Aku nyerahka ngagai ketuai parti dini sida iya engkah aku udah ty,” ku Julius madah ngagai pengari Suara Sarawak.

Ku iya mega, sebengkah resolusyen ke besai udah dijapai ba resolusyen Kapit ba dalam taun 2020 suba deka dibai mega ngagai aum TDC tu.

“Resolusyen tu iya nya deka mulaika nama PBDSB ngagai nama asal Parti Bansa Dayak Sarawak (PBDS),” ku Julius.

PBDSB mujur direjister kena napi pengawa bepilih kena 28 Ogos 2013 lalu endang sebuah parti ke tulin Dayak lalu ngena rambai jaku ‘Agi Idup Agi Ngelaban’.

Udah nya ku Julius, berebak enggau TDC PBDSB ti diatur ujung bulan March, pengawa baum renggat pampang deka dulu diatur parti tu.

“Pia mega deka madahka indu opis PBDSB deka dipindahka ngagai Sibu Jaya ambika bala raban parti sereta orang mayuh nemu dini endur opis ke baru tu,”ku Julius.

Aum tu ila deka diatur ba sebengkah hotel di Sibu lalu deka berengkah pukul 8 pagi nyentuk pukul 5 lemai.

Suara Sarawak