FOTO GHAZALI BUJANG

KUCHING: Urung 300,000 iku rayat di menua tu ti udah tau nerima dos vaksin pengalak Covid-19 bedau datai nganjung diri nerima vaksin pengalak nya.

Sapit Kepala Menteri ti mega Chairman Komiti Penyangga Penusah Nengeri (JPBN) Datuk Amar Douglas Uggah Embas madahka iya minta ngambika rayat ti bedau nerima dos vaksin pengalak tu jampat datai kediri ngambi tuchuk vaksin ungkup pengelantang pengerai mensia mayuh.

“Sarawak nyadi nengeri ti pemadu mayuh meri vaksin ungkup rayat naka tu.

“Taja pia, urung 300,000 iku rayat di menua tu ti ulih nerima dos pengalak vaksin Covid-19 bedau datai ngambi vaksin pengalak nya,” ku iya.

Uggah bejaku munyi nya rambau aum media pengudah ngelancharka Program Meri Vaksin Nembiak (PICKids) Sarawak di Auditorium CRC Sepital Besai Sarawak (HUS) ditu, tadi.

Uggah madahka, bungkur orang ti udah tauka tau nerima dos vaksin pengalak naka 2 Februari tu tadi udah nyapai 88.3 peratus.

Suara Sarawak