THOMAS PENGIRAN

Industri muzik Iban endang enda pungkang ngangkatka penau penanyi baru ngambika terus ngerembai enggau besaup ngidupka industri tu.

Tu mega siti pekara ke chukup manah awak ulih ngerembaika jaku Iban semampai ulih didinga enggau ekonomi pengemeran industri tu empu.

Serak tu, Suara Sarawak mai bala pemacha enggau peminat lagu Iban bekelala enggau siku penanyi baru ti ngembuan sada nyawa ke lunak iya nya Thomas Pengiran.

Thomas siku nama baru dalam seni pemerindang madah diri endang peranak asal menua Kapit lalu anak ke pengkuan ari empat iku diri menyadi ti mega ngembuan batang pengawa ba Opis Pelajar Bagi Menua Kapit.

MINAT BELAGU ARI MIT

THOMAS PENGIRAN

Asal ari Rumah Jarop, Pulau Pisang Batang Rajang Kapit, endang ngembuan minat ba pengawa belagu kenyau ari mit lalu diatu udah nyadi nyata deka nyadi penanyi.

“Keterubah iya, aku nguji ke penau diri ba pengawa belagu iya nya enggau masuk sebengkah pekit belagu.

“Ari nya tadi, aku pan nguji ngemeranika diri ngerikod lagu lalu Puji Tuhan aku mujur ngeluarka lalgu solo keterubah ba taun 2018,” ku Thomas.

Lagu solo nya suba diberi nama Selalu Rindu ti ditengkebang Pengajar Laurence Kendawang mujur nerima sambut ti manah sereta udah dipeda manggai 7000 iku orang ba ba Youtube.

“Udah nya, ba lagu solo kedua aku diberi nama Ensera Nur Hana enggau Nguyum udah dilancharka kena bulan Disember 2021 tu tadi.

AKAI DAMBAI PRODUCTION 

“Leka lagu ba dua ti lagu aku nya tadi ditengkebang Jesley Jabu enggau Matthius Mambang lalu dikeluarka ba baruh perabung Akai Dambai Production,” ku Thomas nyeritaka singke ke baru ari iya.

Lebuh ditanya senentang nama pengarap iya ngagai lagu ke baru iya tu, Thomas arapka lagu ti disadaka iya ulih diterima bala peninga.

Munyi ku iya madah, semua lagu ari iya udah bisi dikeluarka ba churung radio enggau Channel Youtube Aka Dambai Production.

“Ari enam buah lagu solo ti udah dikeluarka aku, lagu Ensera Nur Hana tu mih pemadu dikerinduka aku laban leka lagu kelalu dalam sereta nguji pengelandik tebah nyawa aku.

“Pia mega ba lagu tu bisi negu mimit pendiau enggau jalai pengidup aku ba dunya tu,” ku Thomas.

Nyaut tanya Suara Sarawak senentang ni bagi penanyi dikerinduka iya, Thomas madah diri rinduka semua penanyi Iban laban semua sida nya bisi pengelebih kediri empu magang.

PERANSANG DALAM INDUSTRI

THOMAS PENGIRAN

Lebuh nerangka sapa bagi mayuh meransang iya masuk ba dunya pemerindang, Thomas madah endang nadai orang bukai iya nya sida sebilik empu, kaban belayan sereta bala peminat.

Berebak enggau nya, Thomas ngarapka bala peminat enda leju meri jaku peransang sereta nyukung iya ba dunya pemerindang.

“Arapka bala peminat semampai nyukung semua lagu-lagu kitai Iban. Enti ukai kitai sapa agi dikeandal meri sukung laban diatu lagu kitai udah ulih setanding sereta senipak enggau lagu bansa bukai.

“Sukung ari mensia mayuh mega deka nyadi peransang ngagai kami dikena kami angkat besemekih enggau lagu-lagu bansa bukai,” ku iya.

Suara Sarawak