BALA PENGABANG… GAWAI enda rami enti nadai mayuh pengabang. Gambar ngayanka bala pengabang ke bengepan lengkap kena beramika gawai.

Gawai Mangkung Tiang tu siti ari gawai ti agi mengkang dipejalaika bala kitai Iban di rumah panjai kemaya hari tu . Tu siti gawai kena ngerami sereta ngayan pengaga ati kitai mayuh tegal rumah panjai ti baru tembu digaga.

Raban bansa Iban di serata Sarawak agi tebal ngemeranka pengerami tu, nyengkaum sekeda ke beambika pemesai baka menteri tauka bala pengari rayat, bala MP sama datai bejadika pengerami tu.

Bisi mega sekeda rumah panjai ke baru tembu digaga nya nirika Gawai Mangkung Tiang ti besai lalu sikap enggau pengap, taja pan pengawa mengap ba gawai tu udah jarang agi dikereja beduduk ari suntuk lemambang ke nemu ngereja pengap tu.

Taja pia, mayuh rumah panjai ba kandang menua Saratok enggau Betong, iya nya ba Batang Krian enggau Saribas, bisi dipengapka gawai sida laban agi bisi sekeda raban lemambang ke bisi penemu dalam pengap Gawai Mangkung Tiang.

Siti ari genteran pengap ke enda tau enda disebut lemambang nya baka genteran ke madahka rumah tembu sereta mega ngerara rumah deka begawai.

NGELALU PETARA… BALA sida indu dara ngena ngepan ngelalu Petara maya Gawai Mangkung Tiang.

Nya alai ditu penulis deka bekunsi mimit jalai sebut lemambang ba pun genteran pengap sida, nitih padah niang Lemambang Salok Jembu, iya nya apai penulis empu.

“Tu baru rumah mua pemanah,
Ke reregah udah tembu.
Tu baru rumah panjai enggi kitai,
Tak begamal libai-libai,
Nadai utai agi dipegai udah badu.

Ba senentang genteran leka pengap ke ngerara rumah begawai nya baka tu:
O, lapa tak perintik tisau langit burik,
Enggi kitai apai tak belik-belik,
Baka petik lachau engkarung.

O, lapa kerepau langit ijau,
Enggi kitai apai tak menawa liau-liau,
Baka likau rimau jelu remaung.

Tak lalu pegari mua penampak,
Meh petakang bintang banyak,
Ke begamal berak-berak,
Baka pantak kuling labung.

Tembu nyebut leka pengap nya tadi, sida lalu ngading iyang lemambang. Udah nya sida lalu nyebut genteran ke dikumbai Nyerayung Pandung lalu ditangkan enggau genteran sida ke bebai angkat mengap niti rumah.

Tu lalu ditangkan enggau genteran Beranchau Tikai, Betanggung Baku sereta Betibak Ubat Enda Layu.

RUAI DILAGU…ENDANG gaya ruai rumah panjai ti deka begawai dilagu manah enggau bemacham barang pengias.

NINGA LEKA PENGAT LEMAMBANG

Nangka nya baru sida datai ba genteran ke dikerindu penulis, iya nya Ngerintai Tuai Iban.

Nyadi ba rintai tuai tu endang nitih tuai ba ai siti-siti, taja pan ba pun iya endang sama laban ngayanka bala kitai Iban endang datai ari pun enggau asal ti sama.

Leka pengap nya munyi tu:

“Nya baru terai-terai betenchang ratai,
Tu baru mulut kitai nyebut ngerintai tuai.

O sapa tuai ke dulu dikumbai diambi ngabang,
Sapa tuai lama ke dulu ditesa bilang lemambang?

Ni lebih ari Semarugah nya orang ke empu tanah
Nemu bagi iya ke manah,
Nemu ke renjan ngelala ke ringkah,
Enggau nemu iya betuah alai bumai.

Ni lebih ari Sera Gindi ke tau ngaga ai,
Ukai siti mayuh perabeni simpang sungai,
Ni lebih ari Sera Gindit ke tau ngaga langit,
Agi kelia mua pengemit tang nyau puas ditari naka pemesai.

Ni lebih ari Sera Gindam ke tau ngaga malam,
ke kelam sabung lemai.

Nya baru ngelengkaka tuai kelia
Aku deka ngerintai tuai bukai.

(Ditu mayuh genteran dikelaung laban engkejuk ngagai tuai menua diri empu di Krian.)

Nya baru tebang kempan berangan ujan,
Tu baru mulut nyebut rintai tuai Krian.

Ni nuan Kanyung, diau di tuchung Bukit Legong,
berayan tudung basung puang.

Ni nuan Seguat datai ari Menyaung Tuchung Bukit Tengalat Perepat Ruap Bunga Pasang.

Nya baru ngangauka tuai penama Anya,
Kedua bali nama Lebur Menua pemungkal Kedap nunggang.

Kitai anang enda ngangau Pengulu Bungin ke mega menyadi Jatan,
Bran enggau Gulang, sida empat tu endang anak Anya Lebur Menua seduai bini iya Empiang.

Udah nya kitai mega ngangauka Tawi anak Bungin, kedua bali nama Lanang Kasih Sayang Bedindang Madang Rutan, Tawi Berani Ati Pemudi Kayan pungka laki belelang.

Kangauka mega meh Aki Kawit kedua bali nama Berinau Panggau Dara Naing Pengerambing Kuta ke lama udah midang.

Sama dikangau mega Subung Aki Musa,
Ke begela Kala Nyepit Naka Pemisa-misa,
Bunga Parapenit ka Dujung Indu Dara ke berani udu tebilang.

Nya baru tau ngangauka Ngauh Narang ke bensumbar Layang Mandi Pukul Lapan
Bedengah mudah munsuh ili dipalu enggau seligi pugu panga senapang.

Kitai mega sama ngangauka Salok Apai Dinggu,
keterubah Iban meda naga ayan siku Taja,
bekenaya tang segenda entanchar dulu,
Ngujung bemimpi betemu enggau
Keling Bunga Nuing ke nyumpah iya
gayu nguan menua nyadi tuai lemambang.

Udah tembu lemambang ngerintai sekeda tuai Iban,
nya baru sida ngerembaika rintai tuai sida nyengkaum bala Laut tauka raban bansa Melayu.

Leka pengap nya enda dipansutka semua ditu :

Udah tembu bala lemambang ngerintai bala Laut enggau tuai Iban,
nya baru sida ngerintai tuai Panggau Libau
enggau orang Gelong Batu Benang.

Leka pengap sida munyi tu :

“Nya baru tebang bu menalu nusu,
Tu baru mulut aku nyebut ngerintai tuai antu.

Ni nuan Nading Panas Kuning,
Ditelah aku Perenching Bunga Besi,
Sepit Api ke bejari rangang-rangang,
Bejalai Melit tisau langit,
Ngelung ngelingkung besabung galang.

Nya Si Gundi apai Keling Aji,
Ke berani tau serang.

Ni nuan Sempun Merurun Api Neraka,
Beliung Lajung Kambuh Maluh,
Rentang-rentang penebang batang sana merajawa,
nya berada apai nuan Laja,
Lau mua penyampu leka balang berang.

Ni nuan Antu Kara ke beruwa tayun tunsang,
Nya ga berada apai nuan Simpurai,
Bejuluk Muntigerai simbang jerungkang.

Ni nuan Pendawan Bemata Tajam,
Ke ditikam mali salah,
Ni nuan Berayang Beruit Tangang,
Ke gelemetang mandi darah,
Nya berada apai nuan Lua Limban,
Bejuluk Balan Seligi Pinang.

Ni nuan Tangkai Jawa Jambai
Taburka di umai mali nawang.

Ni nuan Jawa Sebaka,
Tanam di temuda mali diperimba,
Ke sedepa mali lapang.

Nya berada apai nuan Pungga
Digelar Bujang Si Puntang Medang.

Udah abis aku kangauka tuai orang Panggau Libau,
tu baru aku nampung enggau tuai orang Gelong.

Nya baru kangauka Lembang Tempalang Sabang,
Entak Lelayang Bingkai Tanggi.

Menua iya di geluga ai mansang,
Bala tibang sarang padi.

Kedua bali nama iya di menyaung
Tuchung Kenyalang,
Pansa Kumang ke berundang ngiga laki.

Ni nuan Patung Manuk Tuntung
Ke disabung mali balang.

Ni nuan Pala Manuk Lia
Ke dilengka mali lengang.

Ni nuan Sega Sedepa ,
Digagaka ringka igi balang,
Nya berada apai nuan Tutung,
Digelar Bujang Lemandau Gendang.

Ni nuan Ipuh Munuh
Ke dikesuh nyadi naming.

Ni nuan Antu Ngasu
Ke bekelapu bulug gading
Nya berada apai nuan Enting Naing
Enda nyelaingka sumping dengah or,ang.

Ni nuan Parang Indu Duku,
Ni nuan Berangai Indu Perau,
Nya berada aya Apai Migu,
Mangkang bedilang tegar bekindu,
Laban iya tembu nyampu dengah orang.

Ni nuan Galang Indu Batu,
Ni nuan Berayang Sangkuh Lunju,
Ke dipuji lumur Satu,
Ngebuka pintu kuta labang.”

Tu naka genteran lelambang ngerintai tuai dalam pengap Gawai Pangkung Tiang. Maya sida ke nyau tembu ngerintah hari pan udah jauh endar malam. Orang selalu menggal pengap sida ngena atur ngirup kupi.

PIRING GAWAI…GAYA gamal piring engkah ba atas tajau maya gawai.

 

NGAJAT…SITI ari aktiviti maya ngintu Gawai Mangkung Tiang iya nya bisi orang ngajat.

 

Pua kumbu diinggap ba dinding ruai rumah panjai.

Suara Sarawak