MIRI: Gelar ‘Premier’ nunjukka status Sarawak diaku bebida enggau nengeri bukai dalam Perintah Besai laban engkeman enggau hak Sarawak di baruh Sempekat Malaysia 1963 (MA63).

Kepala Menteri Datuk Patinggi Abang Johari Tun Openg madahka gelar nya deka ngaku Sarawak nyadi sebuah nengeri ke bebida enggau nengeri bukai.

“Sarawak nadai, nadai Malaysia lalu pemisi Sarawak enggau Sabah, ari nya meh Malaysia ditumbuh.

“Aku semina deka madahka tu ukai pekara ti nunjukka kitai leluba ari Dun Sarawak, tang nya meh ngaku status Sarawak dalam Malaysia,” ku iya.

Abang Johari bejaku munyi nya rambau Pengerami Makai Lemai Gerempung China Bersekutu Bagi Menua Miri di Eastwood Valley Golf & Country Club Miri, malam tadi.

Ku iya nengah MA63 iya nya lebuh Sarawak setuju nyadi entara raban dalam penumbuh Malaysia, endang tuju Sarawak awakka status nya nyadi sebuah ari tiga wilayah (Serakup Malaya, Sabah enggau Sarawak) numbuhka Perintah Malaysia ti baru.

Ku iya, nya ngangkatka Sarawak nyadi sebuah ari tiga wilayah ke alai Sarawak dianggap nadai ngembuan status ti sama enggau nengeri komponen bukai dalam Serakup Tanah Melayu.

Abang Johari madahka MA63 udah disain lima raban iya nya United Kingdom (UK), SerakupTanah Melayu, North Borneo (Sabah), Sarawak enggau Singapore kena 9 Julai 1963 numbuhka sebuah menua baru dikumbai Malaysia.

“Nya alai, kitai (Sarawak) nyadi kelai ti bebida lalu tu mesti diaku. Aku ngira Perintah Malaysia enggau semua Kaban Parlimen ngaku MA63 nitihka Konstitusyen Perintah Besai ke alai nya meh begian enggau bakih kunsi dibaruh Pekara 160 Konstitusyen Perintah Besai,” ku iya.

Ku iya, Perintah Gempung Parti Sarawak (GPS) meda pekara tu endur Perintah Sarawak mesti bebida ari nengeri Serakup Tanah Melayu.

Nangkan ke nya, ku iya semua nya ukai ungkup iya empu, tang dikena ngetanka hak Sarawak.

“Ukai ungkup aku (gelar Premier) tang tu ungkup Sarawak laban Sarawak endang sebuah entiti enggau patut dijaga setipak enggau Sempekat Malaysia 1963,” ku iya.

Ba program nya, Abang Johari udah nyerahka chek beungkus RM5,000 ngusung Sekula Sekondari (SM) Pein Min enggau SM Riam.

Iya mega meri agih belanja penyampau RM500,000 ngagai Gerempung Besai China Bagi Menua Miri.

Sama bisi datai Sepit Kepala Menteri Datuk Sri Dr Sim Kui Hian, Menteri Perengka Pengangkut Datuk Seri Lee Kim Shin, Menteri Muda Pemansang Orang Indu, Anak Mit Enggau Pengelantang Raban Bansa l Datuk Rosey Yunus, Menteri Muda Nembiak, Lumba Enggau Pemansang Dagang ll Dr. Ripin Lamat, Presiden Gerempung China Bersekutu Bagi Menua Miri Datuk David Goh Kien Ping enggau ke bukai.

Suara Sarawak