Chap dagang GDiva Collection

INDU bajik benama Georgia anak Uma tu asal ari menua San Semanju, Engkilili udah ngepunka dagang GDiva Collection dalam taun 2016 lalu ngerembai nyentuk diatu.

Dagang dipungkal enam taun ke udah nya bisi penyelai enggau pengelebih ari kompeni dagang bukai laban semua pengawa dipejalai ari rumah iya empu. Reti iya, Georgia ulih ngelimat belanja ari bebayarka suwa rumah kedai dikena ngemansangka dagang kelimpah ulih ngena penuh jam bedagang.

Iya ngena pengelebih media rama baka Facebook, Telegram enggau Whatsap bejualka bemacham produk dagang online.

“Aku endang rindu bedagang. Sebedau aku numbuhka kompeni aku empu tu, aku semina nyadi dropship, mantu orang bukai bedagangka produk sida. Nya pan semina rindu ati kena ngisi maya lepa.

“Nyau kelama, meda timbal chukup manah lalu peminta majak mayuh, dia ati majak ransing bedagang ngujungka aku teulihka runding muka dagang kediri empu.

Georgia anak Uma

“Ba taun 2016, aku pan mujur numbuhka kompeni GDiva Collection tu,” ku iya ngepunka randau enggau Suara Sarawak.

BEMACHAM PRODUK

Ngelama tu ku Georgia, mayuh orang betanyaka nama bansa produk ti dijual iya.

“Nyau munyi ke tinggi jaku tudah aku lebuh nyaut sida maya aku madahka diri nyual sebarang bansa produk ke ulih dijual.

“Endang amat, ukai jaku kelulu kena ngelaguka dagang diri. GDiva Collection sigi bedagangka mayuh bansa produk nyengkaum mayuh macham bansa gari baka baju, tanchut enggau gaun.

“Pia mega kantung, kerepai, kasut, telefon, set tilam, periuk, pinggai, mangkuk, ngepan pupu bansa enggau mayuh ke bukai.

“Pandak jaku, aku tu siku orang ke enda muai peluang ngapa, asal bisi peminta enggau untung, produk nya sigi dijual aku,” ku iya.

Georgia madah, sekeda gari diangkat iya ari menua luar baka China, Vietnam, Thailand enggau Indonesia sereta ari Kuala Lumpur.

Set periuk diambi iya ari Kelantan enggau Sarawak lalu set ngepan pupu bansa baka ngepan Iban, Bidayuh enggau Orang Ulu sigi ari Sarawak empu.

PEMAR BEDAGANG

Ngepunka dagang ukai muntang munyi mulut kitai ke bejaku. Bala pemeli mega enda datai ngapa enti kitai enda enggau naka ulih ngiga sida.

“Terubah ngepunka dagang suba, penguji besai ditapi aku lebuh begigaka bala pemeli. Bisi maya nadai siku pemeli dalam sehari, tang nya enda ngasuh aku mantul.

“Aku sedar, produk enggau chap dagang agi baru lalu empai dikelala endar. Tambah mega, pengandal ati bala mayuh ngagai produk dagang aku agi kurang.

“Nya alai aku majak mandangka produk diri sebelah media rama baka Facebook ngambi ditemu bala mayuh,” ku iya.

Nikalka kenang, Georgia madahka diri kala ditipu siku supplier ngujungka iya rugi RM3,450. Maya nya, asaika labuh jantung iya nerima berita nya. Taja pia, iya nyadika pekara nya lalau chukup beguna ngambi bejimat agi dudi hari.

Nambahka nya, iya mega suah rugi laban produk dijual iya pechah lebuh datai ba bala pemeli sereta sekeda lenyau enda temu penunga maya proses nganjung barang nya.

Sekeda ari produk GDiva Collection

NGELAKUKA PRODUK

Ku Georgia, pengawa ngelakuka produk dagang GDiva Collection sigi seratus peratus nengah media rama baka Facebook, Telegram enggau WhatsApp.

“Diatu aku nyau kurang mandangka produk dagang ba Facebook laban deka meri peluang ngagai bala dropship mandangka produk nya nengah media rama sida empu.

“Naka ke diatu, aku bisi urung 40 ngagai 50 iku kaban dropship ba selampur menua baka di Sarawak, Sabah enggau Semenanjung.

“Kena ngelakuka agi produk dagang GDiva Collection, aku suah ngaga pekit ungkup bala follower ba Facebook. Sida ti pemadu mayuh bekunsika produk nya deka bulih perais ari aku,” ku iya.

TIMBAL PEMELI

Baka orang bukai ku Georgia, timbal bala mayuh ngagai produk GDiva Collection enda ngemantupka ati iya maya terubah bedagang suba. Kebuah pia laban produk nya bedau dikelala bala mayuh sereta sida agi kakang ati deka meli produk ari iya.

“Aku meri besai terima kasih ngagai Petara laban udah ngiring lalu merekatka pejalai dagang aku.

“Ba taun 2018 nyentuk diatu, peminta bala pemeli majak nambah ninting hari. Pia mega, bala follower aku ba Facebook enggau Telegram mega majak nambah. Sehari tu, bala subscriber raban GDiva Collection ba Telegram udah manggai 2,574 iku,” ku iya.

Naka diatu, bala pemeli produk iya endang peranak menua kitai tu empu sereta bala ari menua Indonesia mega bisi betanya.

Tang Georgia agi kakang ati ngerembaika produk diri ngagai menua luar laban bedau bisi peneleba enggau penau senentang pekara nya.

Taja pia, iya arapka dagang diri ulih ngerembai ngelekai ngagai menua luar dudi hari nyema udah chukup penemu enggau peneleba dikena nyikap diri.

“Ukai jaku lawa tauka jaku sumbung mandangka pengelebih diri. Untung kasar ulih aku ari pengawa dagang tu, nyengkaum ungkus modal enggau ungkus nganjung, ba bulan Januari 2022 tu tadi manggai RM72,000.

“Lalu ba taun 2021, untung kasar dagang GDiva Collection manggai RM1.14 juta, nyengkaum ungkus modal enggau ungkus nganjung.

“Untung ari dagang tu, aku ulih meli utai dikeingin ati baka kerita ti dikerindu enggau meli rumah ngena nama aku empu,” ku Georgia mantaika pengaga ati.

Tugung barang udar bala pemeli produk GDiva Collection

TIBAR PERANSANG

Georgia ngarapka G-Diva Collection majak dikelala nengah pelasar media rama, bala mayuh nemu endur bebelika produk dikerindu sida laban semua utai ba ujung jari magang diatur diparit pemansang teknologi digital enggau arus penyambung.

“Nuju semua kitai ke indu nadai ngira kereja tauka enda, anang sesekali kitai ngemaruhka diri empu.

“Aram mih kitai sama ngena peluang ngemansangka diri, besemekih enggau orang bukai ngulihka pengidup.

“Enti kitai amat keran deka ngubah pengidup, kena mih peluang ke bisi ngangkatka diri empu, sigi nadai utai enda ulih dikereja kitai.

“Enti nyema aku ulih ngereja iya, kita pan ulih asal anang mantul ati napi mayuh macham penguji. Laban penguji nya endang sigi adat ba pengawa dagang.

“Anang mega tusah ati sema nadai batang pengawa ti menyana baka orang bukai, nengah pengawa dagang online tu mega kitai ulih nyungkak ekonomi diri empu enggau ruang bilik kitai,” ku iya.

Georgia madah, siti pekara pemadu beguna lebuh bedagang online nentuka dagang ulih beretan lama, anang sesekali nipu orang, kitai patut bedagang ngena chara ti manah sereta lurus ati.

Ngena awak tu, iya meri terima kasih ngagai semua dropship GDiva Collection enggau bala pemeli ke enda nemu leju meri sukung enggau ngelempaika pengandal ngagai chap dagang nya.

Enti ukai ari sukung semua sida ti kiruh bebeli lalu mandangka produk sebelah media rama kelebih agi ba maya pandemik Covid-19, GDiva Collection enda ulih mujur datai ba tikas ke diatu.

Georgia mega meri terima kasih besai ngagai laki ti dikesayau ti semampai nyukung iya ngelama tu sereta bala apai indai, entua, bala ipar ti enda ngetu-ngetu meri jaku ajar enggau peransang ti chukup beguna ngagai iya neruska pengawa dagang nya.

Dikena nutup randau, Georgia meri terima kasih ngagai Suara Sarawak laban udah ngerandau lalu mantaika pejalai dagang iya ngambi ulih nyadi peransang kelebih agi sida ke indu.

Bala mayuh ti deka nemu enggau silik tauka bebelika produk GDiva Collection, kita tau ngelawa Facebook: Georgia Uma, page Facebook: G’diva Collection enggau raban GDiva Collection ba Telegram tauka whatsApp terus ngagai Georgia empu ba lumur 013-4981659.

Suara Sarawak