KUCHING: Opis Betanam Betupi Sarawak (JPS) mesti ngubah enggau nyeririska sistem subsidi sereta bantu ke diberi bepelasarka guna dikena nyeliahka belanja tebasau ngapa.

Menteri Betanam Betupi Moden enggau Pemansang Wilayah Datuk Seri Dr. Stephen Rundi Utom madah, bantu ke diberi perintah ngagai sida ba sektor betanam betupi mesti engkeman enggau meri pemaik.

“Ngelama tu, perintah meri bantu betanam betupi baka baja, paung kayu enggau ke bukai ngagai raban orang bumai B40, nitih naka ke diasai diguna sida.

“Tang kebendar ngelama tu barang nya ditaruh ba baruh rumah laba nya ukai utai ke berat diguna sida nyadi pekara tu nyau masau belanja.

“Nya alai, diatu perintah mesti berubah, awak raban tu empu madahka rintai bansa bantu ke diguna sida,” ku iya.

Iya madah munyi nya ba aum pemberita pengudah penemuai ngagai Palan Betanam Betupi Semongok, Jalai Puncak Borneo, ditu kemari.

Nerang silik, ku iya chara baru nya ulih dipejalai laban udah bisi data peminta ari sida ke begunaka bantu ti lebih engkeman.

Nya alai, iya nesau JPS beratika peminta raban tu laban peminta sida mega tentu bebida ari pangan diri.

“Ambika chunto, sida pekebun mit ba industri kelapa sawit patut ngemanah agi jalai kenun sida enggau sida mega begunaka baja, tu utai ke dipinta sida ba perintah.

“Nya alai, pekara baka tu patut diberi perati ngagai sida, baru bantu nya dipeda bisi reti,” ku iya.

Ngelansa pekara bukai, kiya minta staf Palan Pemansik Semengok ngelakuka asil pansik enggau patut dikerembai ungkup tuju komersial.

Suara Sarawak